काठमाडौं । ललितपुरको रातो मच्छिन्द्रनाथको रथको मर्मत सुरु गरिएको छ । मच्छिन्द्रनाथको रथ जात्रा चलिरहेका बेला निकै ढल्किएपछि रथ तान्ने क्रमलाइ रोकेर मर्मत कार्य सुरु गरिएको हो ।

रथ तान्ने क्रममा चक्काको माथि हुने मलाखे भाँचिएपछि तान्न समस्या भएको थियो । त्यसपछि ललितपुर गुठी संस्थानले सूचना जारी गरी मर्मत कार्य गर्नुपर्ने भन्दै केही दिन रथजात्रा स्थगित हुने जनाएको थियो । रथको पूर्णरूपमा मर्मत भएपछि पुन: तान्न सुरु गरिने र लगनखेल पुर्‍याइने स्थानीयले जनाएका छन् ।

मच्छिन्द्रनाथको रथयात्रा वैशाख शुक्ल प्रतिपदामा सुरु भएर आषाढ शुक्ल चतुर्थी (दुई महिना) सम्म चल्छ । रातो मच्छिन्द्रनाथ जात्रालाई पाटनको सबैभन्दा महत्त्वपूर्ण तथा उपत्यकाकै सबैभन्दा लामो जात्राका रूपमा लिइन्छ ।

हिन्दु धर्मावलम्बी मछिन्द्रनाथलाई ऐतिहासिक करुणामयको रूपमा पुज्छन् । बौद्ध धर्मावलम्बी ‘पद्मपाणि’ अर्थात् पञ्चबुद्धमध्येका चौथो बुद्धका रूपमा पूजा गर्छन् । मछिन्द्रनाथको रथ यात्राको अन्तिम दिन भोटो देखाउने जात्रा हुन्छ ।

पुल्चोकमा रथारोहण गरी सुरु भएको मच्छिन्द्रनाथको रथयात्रा गाःबाहल, मंगलबजार, सुन्धारा, लगनखेल, इटिटोल हुँदै जावालाखेलमा पुर्‍याएर भोटो देखाइन्छ ।  पौराणिक कथन अनुसार १२ वर्षसम्म अनिकाल लागेपछि भक्तपुरका तत्कालीन राजा नरेन्द्रदेवले यो जात्राको सुरुवात गराइएको किंवदन्ती छ ।