काठमाडौं । कौसी थिएटरमा आगामी जेठ ३ देखि नाटक ‘गिल्टी अर नट गिल्टी’ मञ्चन हुने भएको छ । राजकमल फकिरको निर्देशन तथा डिजाइनमा तयार भएको नाटक जेठ २६ गतेसम्म मञ्चन हुनेछ । 

नाटक रसियन–अमेरिकन लेखक अयन र्‍यान्डको नाटक ‘अन द नाइट अफ जनवरी सिक्सटिन्थ’मा आधारित छ ।

नाटकले अग्रवाल इन्भेस्मेन्ट भेन्चरका सञ्चालक राधेश्याम अग्रवाल पात्रको १९औँ तलाबाट खसेर मृत्यु भएपछि घटना हत्या हो अथवा आत्महत्या भन्ने विषयको अदालती बहस प्रस्तुत गर्नेछ ।

रहस्य र थ्रिलर जानरामा बनेको नाटकमा विजय ताम्राकार, आभास अधिकारी, समापिका गौतम, बासना तिमल्सिना, रुपेश लामा, सागर दाहाललगायत कलाकारको अभिनय छ । 

नाटकमा ध्वनी संयोजन नरेश गजुरेलको रहनेछ भने प्रकाश व्यवस्थापन आशान्त शर्माको रहने कौसी थिएटरले जारी गरेको प्रेस नोटमा उल्लेख छ ।