जर्जिया । जर्जियामा प्रेस स्वतन्त्रता प्रतिकूल हुने गरी ल्याइएको विधेयकविरुद्ध विपक्षीले गरेको प्रदर्शनका क्रममा प्रहरीले अश्रुग्यास र पानीको फोहोरा प्रहार गरेको छ ।
सरकारले रुसबाट प्रभावित भएर यस्तो विधेयक ल्याएको भन्दै हजारौँ मानिसले जर्जिया र युरोपेली संघको झन्डा हल्लाउँदै संसद् भवनबाहिर प्रदर्शन गरेका थिए । उनीहरू लगातार दोस्रो दिनदेखि प्रदर्शनमा रहेका जनाइएको छ ।
सांसदहरूले विवादास्पद ‘विदेशी एजेन्ट’सम्बन्धी विधेयक बुधबार पारित गरेका थिए ।
युरोपेली आयोगका अध्यक्ष उर्सुला भोन डेर लिएनले आफूले जर्जियाको घटनालाई ठूलो चासोका साथ हेरिरहेको जनाएकी छन् ।
सत्तारूढ जर्जियन ड्रिम पार्टीले प्रस्ताव गरेको सो विधेयकमा गैरसरकारी संस्था र स्वतन्त्र मिडिया जसले २० प्रतिशतभन्दा बढी विदेशी सहयोग लिएका छन्, उनीहरूले विदेशी शक्तिको स्वार्थमा चलेको संगठनका रूपमा दर्ता गर्नुपर्ने उल्लेख छ ।
साथै, न्याय मन्त्रालयका तर्फबाट उनीहरूलाई अनुगमन गरिने र संवेदनशील सूचना पनि जानकारी गराउनुपर्ने नत्र २५ हजार जर्जियन लारी जरिवाना तिर्नुपर्ने जनाइएको छ ।
विपक्षीले सो विधेयकलाई अधिनायकवादबाट प्रभावित भन्दै छिमेकी रुसले विरोधीलाई दबाउन प्रयोग गरिरहेको जनाएको छ । जर्जिया सरकारले भने पारदर्शिताका निम्ति यो विधेयक ल्याइएको जनाएको छ । बीबीसीबाट ।
