काठमाडौं । इन्डियन प्रिमियर लिग (आईपीएल)मा राजस्थान रोयल्सले पञ्जाव किंग्सविरुद्ध तीन विकेटको रोमाञ्चक जित निकालेको छ । शनिबार मुल्लानपुरमा भएको खेलमा पञ्जावले प्रस्तुत गरेको १४८ रनको लक्ष्य राजस्थानले १९.५ ओभरमा सात विकेट गुमाएर पूरा गरेको हो ।

राजस्थानलाई जितका लागि अन्तिम ओभरमा १० रन आवश्यक हुँदा सिम्रन हेटमायरले पञ्जावका अर्शदीप सिंहले गरेको ओभरको तेस्रो बलमा छक्का, चौथो बलमा दुई रन र पाँचौँ बलमा पनि छक्का प्रहार गर्दै जित निश्चित गरेका हुन् ।राजस्थानलाई जित दिलाउन ओपनर यसश्वी जैसवालले सर्वाधिक ३९ रन बनाए । हेटमायरले २७, टानुस काटिआनले २४, रियान परागले २३ र कप्तान सन्जु सामसनले १८ रन जोडे ।

पञ्जावका कागिसो रवाडा र साम करनले समान दुई विकेट लिए । यस्तै, अर्शदीप सिंह, लियम लिभिङस्टोन र हर्शल पटेलले एक–एक विकेट लिए ।

त्यसअघि टस हारेर सुरुवाती ब्याटिङ गरेको पञ्जावले निर्धारित २० ओभरमा आठ विकेट गुमाएर १४७ रनको योगफल खडा गरेको थियो । 

पञ्जावका आशुतोष शर्माले सर्वाधिक ३१ रन बनाएका थिए । जितेश शर्माले २९, लियम लिभिङस्टोनले २१ रन थपे ।राजस्थानका आवेस खान र केशव महराजले समान दुई विकेट लिएका हुन् । 

जितसँगै ६ खेलबाट १० अंक जोडेको राजस्थानले शीर्ष स्थानमा चार अंकको अग्रता बनाएको छ । ६ खेलबाट चार अंक जोडेको पञ्जाव तालिकाको आठौँ स्थानमा छ ।