काठमाडौं । अन्तिम चार ओभरमा ३४ रन आवश्यक हुँदा ६ विकेट गुमाएपछि आयरल्यान्ड वुल्भ्सविरुद्ध नेपाल ‘ए’ २१ रनले पराजित भएको छ ।
शुक्रबार कीर्तिपुरस्थित त्रिवि क्रिकेट मैदानमा वुल्भ्सले प्रस्तुत गरेको २२३ रनको लक्ष्य पछ्याउने क्रममा नेपालले १९.३ ओभरमा सबै विकेट गुमाएर २०१ रनमात्र बनाउन सक्यो । जितनजिक पुगेर हार बेहोर्दा नेपाली टिमबाट उत्कृष्ट ब्याटिङ गरेको लोकेश बमको शतक खेर गएको छ ।
१६ ओभरमा १८९–४ रनको सहज अवस्थामा रहे पनि यसपछि लगातार विकेट जाँदा नेपालले खेल गुमाएको हो । अन्तिम चार ओभरमा ३४ रन आवश्यक हुँदा नेपालले १६ ओभरपछि बाउन्ड्री नै प्रहार गर्न सकेनन् ।
नेपालका बमले १०६ रन बनाए पनि टिमको हार टार्न सकेनन् । उनले ५६ बलमा नौ चौका र आठ छक्का प्रहार गरे । लोकेशले ६८–३ को अवस्थाबाट आरिफ सेखसँग १२१ रनको साझेदारी गर्दै नेपालको इनिङ सम्हालेका थिए । अर्धशतक बनाउन एक रनले चुकेका आरिफले २७ बलमा एक चौका र पाँच छक्का प्रहार गरे । कप्तान विनोद भण्डारीले १६ रन थप्नुबाहेक नेपालका अन्य ब्याटरले भने व्यक्तिगत पाँच रन पनि बनाउन सकेनन् ।
नेपालका कुल चार ब्याटर डक भए । जसमध्ये दुई ब्याटर ‘गोल्डेन डक’ भए । तेस्रो नम्बरमा ब्याटिङका लागि आएका देव र आठौँ नम्बरका राशिद खान एक बलमा पभेलियन फर्किएका थिए । यस्तै, कमलसिंह ऐरीले तीन बल र हेमन्त धामीले दुई बल खेले पनि रनको खाता खोल्न भने सकेनन् ।
वुल्भ्सलाई रोमाञ्चक जित दिलाउन फियोन ह्यान्ड र म्याथ्यु हम्फ्रेसले समान तीन विकेट लिए । म्याथ्यु फोस्टरले दुई विकेट लिँदा थोमस मयेस र गाभिन होइले समान एक विकेट हात पारे ।
त्यसअघि टस हारेर ब्याटिङमा आएको वुल्भ्सले निर्धारित २० ओभरमा पाँच विकेट गुमाएर २२२ रनको योगफल खडा गरेको थियो ।
आयरल्यान्ड वुल्भ्सका पेठर मुरले ४९ रन बनाए । अर्धशतक बनाउन एक रनले चुकेका मुरले ३२ बलमा चार चौका र तीन छक्का प्रहार गरे । २–१ को कठिन अवस्थाबाट मुरले दोस्रो विकेटका लागि केड कार्माइकलसँग ८८ रनको साझेदारी गर्दै वुल्भ्सको इनिङ उकासेका हुन् ।
कार्माइकलले २९ बलमा चार चौका र एक छक्कासहित ३८ रन बनाए । कपन नेइल रकले २३ बलमा एक चौका र तीन छक्कासहित ३८ रन नै थपे । स्टेफन डोहेनीले ३४, ग्यारेथ डेलानीले ३० रन बनाउन गाभिन होइले १८ रन जोडे ।
नेपालका कमलसिंह ऐरीले तीन विकेट लिए । चार ओभर बलिङ गरेका कमलले ३९ रन खर्चिए । चोटका कारण दुई वर्षपछि टिममा पुनरागमन गरेका कमलले इनिङको दोस्रो बलमै विकेट लिएका थिए । यस्तै, उनले वुल्भ्सका स्टेफन डोहेनीलाई १४.४ ओभरमा र १८.१ ओभरमा नेइल रकलाई पभेलिएको दिशा देखाएका थिए ।
कीर्तिपुरमै दुई वर्षअघि भएको मलेसियाविरुद्धको खेलमा कलमको क्ल्याभिकल बोन (ब्युटी बोन) मा चोट लागेको थियो । त्यसयता मैदानबाट बाहिर रहेको कमलले वुल्भ्सविरुद्ध कप्तान विनोद भण्डारीबाट इनिङको पहिलो ओभर नै बलिङ गर्ने अवसर पाएका थिए ।
यसबाहेक, सागर ढकाल र आरिफ सेखले समान एक विकेट लिए ।
वुल्भ्सले नेपाल ‘ए’ सँग तीन ट्वान्टी–२० र एकदिवसीय खेलको शृंखला खेल्ने तालिका छ । यसअघि नेपाल ‘ए’ र वुल्भ्सबीचको ट्वान्टी–२० शृंखला बिहीबारदेखि सुरु हुने तालिका थियो । तर, पहिलो खेल वर्षा कारण सम्भव नभएपछि नेपाल क्रिकेट संघ (क्यान)ले नयाँ तालिका निकालेको हो ।
नयाँ तालिकामा क्यानले वुल्भ्ससँगको तीन खेलको ट्वान्टी–२० शृंखलालाई निरन्तरता दिएको छ । तालिकाअनुसार, नेपाल र वुल्भ्सले शनिबार दोस्रो र सोमबार तेस्रो खेल खेल्नेछन् । ट्वान्टी–२० शृंखलापछि यी दुई टिमले तीन खेलको एकदिवसीय शृंखलामा प्रतिस्पर्धा गर्नेछन् ।
एकदिवसीय शृंखला बुधबारदेखि सुरु हुनेछ । एकदिवसीय शृंखलाको पहिलो खेल बुधबार, दोस्रो शुक्रबार र तेस्रो आइतबार हुनेछ ।