काठमाडौं । कप्तान रोस्टन चेजको अर्धशतकप्रेरित वेस्ट इन्डिज ‘ए’ले घरेलु टोली नेपालविरुद्ध पहिलो ट्वान्टी–२० खेलमा २०५ रनको लक्ष्य प्रस्तुत गरेको छ ।
शनिबार कीर्तिपुरस्थित त्रिवि क्रिकेट मैदानमा टस हारेर ब्याटिङमा आएको वेस्ट इन्डिजले निर्धारित २० ओभरमा पाँच विकेट गुमाएर २०४ रनको योगफल खडा गरेको हो ।
वेस्ट इन्डिज ‘ए’ का कप्तान चेजले ४५ बलमा नौ चौका र दुई छक्कासहित ७४ रन बनाए । चेजले १४६–४ को स्थितिबाट एडिम एलिनेसँग तेस्रो विकेटका लागि ५७ रनको साझेदारी गरेका थिए ।
ओपनर एलिक अथानाजेले २५ बलमा पाँच चौका र तीन छक्कासहित ४७ रन थपे । केसी कार्टीले ३८ रन थप्दा कडिम एलेयनेले १४ र एन्ड्रे फ्लेचेरले १३ रन बनाए ।
नेपालका कमलसिंह ऐरी, कप्तान रोहितकुमार पौडेल, दीपेन्द्रसिंह ऐरी र अभिनाश बोहराले समान एक विकेट लिए ।
वेस्ट इन्डिज ‘ए’ विरुद्ध आज नेपाली टिममा अनिलकुमार साह, विवेक यादव र कमलसिंह ऐरीले मौका पाएका छन् । मुख्य प्रशिक्षक मोन्टी देसाईले आसिफ सेख, सोमपाल कामी र करण केसीको स्थानमा यी तीन खेलाडीलाई मौका दिएका हुन् ।
पहिलो पटक नेपाल भ्रमणमा आएको वेस्ट इन्डिज ‘ए’ले नेपालसँग पाँच खेलको ट्वान्टी २० शृंखला खेल्ने तालिका छ । आजको खेलपछि यी दुई टिमबीचको दोस्रो खेल भोलि (आइतबार) हुनेछ । यसपछि तेस्रो खेल बुधबार, चौथो खेल बिहीबार र पाँचौ तथा अन्तिम खेल शनिबार हुने तालिका छ ।