काठमाडौं । घरेलु मैदानमा आयोजित ट्वान्टी–२० शृंखलामा नेपाल ‘ए’ले आज आयरल्यान्ड वुल्भ्सविरुद्ध पहिलो खेल खेल्दै छ ।
यसअघि आयरल्यान्ड वुल्भ्सले रोहितकुमार पौडेलको कप्तानिमा रहेको नेपाली राष्ट्रिय टिमसँग दुई ट्वान्टी–२० क्रिकेट खेलेको थियो । दुवै खेलमा हार व्यहोरेको आयरल्यान्ड वुल्भ्स आज पहिलो जितको खोजीमा हुनेछ ।
वुल्भ्सविरुद्ध नेपाल ‘ए’ विनोद भण्डारीको कप्तानीमा उत्रिनेछ । कीर्तिपुरस्थित त्रिवि क्रिकेट मैदानमा हुने यो खेल दिउँसो १ बजेदेखि सुरु हुनेछ ।
यसअघि नेपाल ‘ए’ र वुल्भ्सबीचको ट्वान्टी–२० शृंखला बिहीबारदेखि सुरु हुने तालिका थियो । तर, पहिलो खेल वर्षा कारण रद्ध भएको थियो ।
नेपाल ‘ए’ र आयरल्यान्ड वुल्भ्सबीचको पहिलो ट्वान्टी–२० खेल आज
आज पनि काठमाडौंमा बिहानैबाट वर्षा भइरहेको छ । दिउँसो पनि वर्षाको सम्भावना छ । “बिहानैदेखि काठमाडौंमा वर्षा भइरहेको छ । केही ठाउँमा अहिले पनि वर्षा भइरहेको छ,” मौसमविद् गंगा नगरकोटी बाह्रखरीसँग भन्छिन्, “दिउँसो पनि काठमाडौंमा वर्षाको सम्भावना छ । दिनभरी लगातार वर्षा हुने होइन तर पानी पर्ने र रोकिने हुन्छ ।” उनका अनुसार १ देखि ३/४ बजेसम्म पानी पर्नेछ ।
“कीर्तिपुर क्षेत्रतिर पनि दिउँसो वर्षाको सम्भावना छ । १ बजेपछि पनि बादल लाग्ने र वर्षा हुनेछ,” उनले भनिन्, “ठूलो वर्षा नहुने तर हल्का वर्षा हुनेछ ।”