काठमाडौं । सात गोलको रोमाञ्चक खेलमा लिभरपुलविरुद्ध ४–३ को जित निकाल्दै म्यानचेस्टर युनाइटेड एफए कपको सेमिफाइनलमा प्रवेश गरेको छ ।

आइतबार राति घरेलु मैदान ओल्ड ट्राफोर्डमा युनाइटेडलाई जित दिलाउन स्कट म्याकटोमिने, एन्टोनी, मार्कुस रासफोर्ड र एमाद डियालोले गोल गरे । लिभरपुलका एलेक्सिस म्याक एलिस्टर, मोहमद सालाह र हार्भी एलिओटले गोल फर्काए पनि टिमको हार टार्न सकेनन् ।

१०औँ मिनेटमा म्याकटोमिनेले गोल गर्दै घरेलु टिमलाई अग्रतामा राखेका थिए । ४४औँ मिनेटमा एलिस्टरले गोल गर्दै लिभरपुललाई खेलमा फर्काए । पहिलो हाफको इन्ज्युरी समयमा सालाहले गोल गरेपछि लिभरपुलले २–१ को अग्रता बनाएको थियो । तर, निर्धारित समयको अन्तिम तीन मिनेट लिभरपुल सम्हालिन सकेन ।

८७औँ मिनेटमा एन्टोनीले गोल गर्दै युनाइटेडलाई खेलमा फर्काए । त्यसपछि खेल अतिरिक्त समयमा धकेलिएको थियो । १०५औँ मिनेटमा एलिओटको गोलमा लिभरपुलले पुनः ३–२ को अग्रता बनायो । लिभरपुलको यो अग्रता लामो समय भने टिकेन ।

११२औँ मिनेटमा रासफोर्ड गोल गर्दै घरेलु टिमलाई पुनः खेलमा फर्काए । इन्ज्युरी समयमा डियालोले निर्णायक गोल गरेपछि युनाइटेडले ४–३ को रोमाञ्चक जित निकाल्दै सेमिफाइनल यात्रा तय गरेको हो ।

निर्णायक गोलपछि जर्सी खोलेर खुसियाली मनाउँदा डियागो दोहोरो पहेँलो कार्डसहित रातो कार्डको दर्शन गर्दै मैदानबाट बाहिरिएका थिए । उनले ११६औँ मिनेटमा पहिलो पहेँलो कार्ड पाएका थिए ।

चेल्सी ४–२ लेस्टर सिटी
आइतबार राति नै भएको अर्को खेलमा लेस्टर सिटीलाई ४–२ ले हराउँदै चेल्सीले पनि प्रतियोगिताको अन्तिम–४ मा स्थान बनाएको छ ।

प्रतियोगिताको सेमिफाइनलमा अब युनाइटेडले फाइनल प्रवेशका निम्ति काभेन्ट्रीविरुद्ध र चेल्सीले म्यानचेस्टर सिटीविरुद्ध खेल्नेछ । दुवै सेमिफाइनल आउँदो अप्रिल २० मा हुनेछ ।