काठमाडौं । चलचित्र विकास बोर्डका सदस्य एवं प्रवक्ता केएल बुढाथोकीले बोर्डका कर्मचारी निराजन गिरीविरुद्ध जिल्ला प्रशासन कार्यालय काठमाडौंमा उजुरी दर्ता गराएका छन् ।

मंगलबार बिहान बोर्ड बैठकमा ‘अनधिकृत रूपमा प्रवेश’ गरेका गिरीले आफू ‘गुन्डा’ भएको भन्दै भौतिक आक्रमण गर्ने आशयसहित धम्क्याएको बुढाथोकीको उजुरीमा उल्लेख छ । गिरीमाथि कारबाही गर्न उनले माग गरेका छन् ।

उनले आफ्नो जीवन सुरक्षाका निम्ति पहल गरिदिन पनि आग्रह गरेका छन् ।

बैठक बसिरहेकै बेला गिरीले बोर्डको गरिमा र प्रतिष्ठाको बेवास्ता गर्दै गुन्डागर्दी व्यवहार प्रदर्शन गर्दा अध्यक्ष, सदस्यसचिव र सदस्यहरूले कुनै प्रतिवाद नगरेको उनको भनाइ छ । त्यसपछि अपमानित र असुरक्षित महसुस गर्दै बोर्ड बैठकबाट बाहिरिएका बुढाथोकीले उजुरी दर्ता गराएका हुन् ।

प्रवक्ता बुढाथोकीले सञ्चार तथा सूचना प्रविधि मन्त्रालयमा पनि सोही उजुरी दर्ता गराएका छन् । “बोर्डमा बेथिति अति भयो । बोर्ड बैठकमा अनधिकृत रूपमा प्रवेश गरेर बोर्ड सदस्यलाई नै धम्क्याउने काम भयो,” उनले भने, “यसका लागि म उजुरी गर्न बाध्य भएँ ।”

गिरीले भने आफू बोर्ड बैठकमै नगएको जिकिर गरेका छन् । “म बोर्ड बैठकमै गएको छैन । कसरी यस्तो आरोप लाग्यो मलाई थाहा छैन,” उनले भने, “यसबारे मलाई केही थाहा छैन ।”