काठमाडौं । चलचित्र ‘महाजात्रा’को टिजर सार्वजनिक भएको छ । निर्माण पक्षले आज सिनेमाको टिजर सार्वजनिक गरेको हो । 

मुख्य पात्र अटाएको टिजरमा पैसा व्यवस्थापनको चटारो देखाइएको छ । आकस्मिक रूपमा प्राप्त पैसा व्यवस्थापन सजिलै गर्न नसक्दा त्यसका लागि कमिसनको खेल सुरु भएको दृश्य टिजरमा समावेश छ । 

‘जात्रा’ र ‘जात्रै जात्रा’पछि षट्कोण आर्ट्सको निर्माणमा तेस्रो शंखलाका रुपमा ‘महाजात्रा’ निर्माण भएको हो । जीवन समृद्ध तुल्याउने सपना र आपतकालीन रूपमा प्राप्त हुने अवसर व्यवस्थापन गर्दा आइपर्ने समस्यालाई चलचित्रले प्रस्तुत गर्ने निर्माण पक्षले बताएको छ । 

चलचित्रमा विपीन कार्की, वर्षा राउत, रवीन्द्र सिंह बानियाँ, रवीन्द्र झा, हरिवंश आचार्य, अर्जुनजंग शाही, प्रकाश घिमिरे, राजाराम पौडेल, प्रवीण खतिवडा, दिव्यदेव, सुमन कार्की, शिशिर बाङ्देल, गौमाया गुरुङलगायत कलाकारको अभिनय छ । 

निर्देशक प्रदीप भट्टराईको लेखन तथा निर्देशन रहेको चलचित्र आगामी चैत ९ गतेबाट प्रदर्शन हुँदै छ ।