पोखरा । ११औँ संस्करणको नेपाल लिटरेचर फेस्टिभलमा ‘एभ्रिथिङ द लाइट टचेज’ उपन्यासबारे चर्चा गरिएको छ । फेस्टिभलका निम्ति पोखरा आइपुगेकी लेखिका जेनिस प्यारियटले पुस्तक लेखनले जीवनमा परिवर्तन ल्याउने सुनाइन् ।

फेस्टिभलको तेस्रो दिनको सत्रमा उनको पुस्तकका विषयमा गरिएको चर्चामा सहजकर्ताको भूमिका प्रतिभा तुलाधरले निभाएकी थिइन् । सत्रमा प्यारियटले पुस्तक लेखनले उनको जीवनमा कस्तो प्रभाव पारेको छ भन्ने बताइन् ।

“पुस्तक लेख्दा कसैको जीवन परिवर्तन हुनुपर्छ भन्ने मेरो मान्यता छ । किनभने, लेख्न थालेको बेलामा तपाईं जस्तो हुनुहुन्थ्यो, त्यो व्यक्ति होइन,” प्यारियटले भनिन् ।

‘एभ्रिथिङ द लाइट टचेज’ वर्गीयकरण, उपनिवेशवाद, उत्तर–औपनिवेशिकताजस्ता विषयवस्तु खोतल्ने उपन्यासका रूपमा चिनिन्छ । यसले प्रकृति र विज्ञान विषयमा गहिरो तथ्य देखाउँछ ।