काठमाडौं । कप्तान लियोनल मेसीप्रेरित इन्टर मियामीले अमेरिकी मेजर लिग सकर (एमएलएस)मा न्यु इंग्ल्यान्डविरुद्ध ४–१ को सहज जित निकालेको छ । 

आइतबार बिहान भएको खेलमा मियामीलाई जित दिलाउन मेसीले दुई गोल गरे । यसबाहेक, बेन्जामिन क्रामास्ची र लुइस स्वारेजले समान एक गोल गरे । न्यु इंग्ल्यान्डका टोसम चान्कालेले गोल गरेका थिए । 

खेलमा अग्रता घरेलु टोली न्यु इंग्ल्यान्डले बनाएको थियो । टोमस चान्कालेले पहिलो मिनेटमै गोल गर्दै आफ्नो टिमलाई अग्रतामा राखेका थिए । तर, मेसीले ३२औँ मिनेटमा बराबरी गोल गरेका हुन् । दोस्रो हाफमा भने मियामीले तीन गोल थप्यो । ६८औँ मिनेटमा मेसीले नै गोल गर्दै मियामीलाई २–१ को अग्रतामा राखे । ८३औँ मिनेटमा बेन्जामिनले मियामीबाट तेस्रो गोल गरे । 

यस्तै, खेलको निर्धारित समय सकिन दुई मिनेट बाँकी रहँदा स्वारेजले गोल गरेपछि मियामीले ४–१ को सहज जित पक्का गरेको हो । जितसँगै ११ खेलबाट २१ अंक जोडेको मियामी इस्टर्न कन्फेरेन्सको शीर्ष स्थानमा छ । न्यु इंग्ल्यान्ड भने नौ खेलबाट चार अंकसहित तालिकाको पुछारमा छ ।