सृष्टिको प्रारम्भदेखि
ब्रह्माण्डमा अहिलेसम्म
के–के जन्मिए होलान्
अनि, लोप पनि भए होलान्
आखिर संसार कसको ?

समयक्रममा
धनवान्, जनवान्, बलवान्
प्रचण्ड प्रतापी भूपतिदेखि
कीटपतंगहरूको पनि
उपस्थिति रह्यो होला
सामर्थ्यवान।हरूकै इतिहास लेखियो
होला
पढी, वाची सुन्ने
काम र क्रम पनि चलिआयो होला
तर, संसार कसको ?

इतिहासवेत्ताहरूका कलमले
शासक र सामर्थ्यवान्हरूका
चुरीफुरीलाई मात्रै लिपिबद्ध गरे पनि
लिपिबद्ध हुनु नपर्नेहरूको सूचीमा राखे पनि
लिपिबद्ध हुन अयोग्य ठानिएका
कीटपतंग, 
निम्छराहरूको पनि
अस्तित्व त होला नि ?

सृष्टिको प्रारम्भदेखि
अहिलेसम्म ब्रह्माण्डमा
विजेताहरू भए होलान्
उपविजेताहरू पनि भए होलान्
दुनियाँ विजयोत्सव मनाउन
व्यस्त र मस्त रहिरहेको 
यस घडीमा
सोध्न मन लागेको छ–
उपविजेताहरूको पनि अस्तित्व 
हुन्छ कि हुँदैन ?

हिजो अस्तित्वमा रहेकाहरू
आज लोप भएको पनि इतिहास होला
आज प्रचण्ड प्रतापी रहेको
जाज्वल्यमान सूर्य
भरे बेलुका अस्ताउनुपर्छ कि पर्दैन होला ?
अनि,
अहम्, घमण्ड, व्यभिचार,
दुराचार, अनाचारका घडा
किन स्थापना गरिँदै छन् त ?

आखिर
सृष्टिसँगै विनाश
जन्मसँगै मृत्यु
अवश्यम्भावी छ भने
आखिर संसार कसको ?
यो विश्वब्रह्माण्ड कसको ?
(दिङ्ला, भोजपुर)