काठमाडौं । चलचित्र ‘ऊनको स्वीटर’को टाइटल गीत सार्वजनिक गरिएको छ । गीतमा सुजन चापागाईंको स्वर र संगीत छ । 

हर्क साउदको शब्द रहेको गीतको भिडियोलाई मोसन ग्राफिक्समार्फत् प्रस्तुत गरिएको छ । चलचित्रका मुख्य पात्रको प्रेमकथाको केही अंश गीतमा प्रस्तुत छ । 

अभिनेता विपिन कार्की र अभिनेत्री मिरुना मगरको प्रेमिल भाव गीतमा चित्रण गरिएको छ ।

‘ऊनको स्वीटर’ नवीन चौहानको डेब्यु फिचर फिल्म हो । कथा पनि निर्देशक स्वयंले लेखेका छन् । 

केही दिनअघि चलचित्रको पहिलो पोस्टर पनि निर्माणपक्षले सार्वजनिक गरेको थियो । 

चलचित्रमा विपीन र मिरुनासँगै माओत्से गुरुङ, अनिल सुब्बा, सुरज तमू, एलेक्स पारस, परीक्षा लिम्बू, मिलन खत्री, अरुण पुन मगर, भावना खपांगी मगर, कवि राई, रुपेश लामा, प्रकाश बस्नेतलगायत कलाकारको अभिनय रहेनेछ ।