काठमाडौं । चलचित्र ‘अगस्त्य च्याप्टर–१’का प्रमुख कलाकारहरूले सरस्वती पूजा र भ्यालेन्टाइन डे मनाएका छन् । 

सिनेमाको पब्लिसिटी गर्दै निर्माण पक्षले पुल्चोक इन्जिनियरिङ क्याम्पसमा आयोजना गरिएको सरस्वती पूजा कार्यक्रममा उपस्थित भएर नाजिर हुसेन र मलिका महतले सरस्वती पूजा र भ्यालेन्टाइन डे मनाएका हुन् ।

फागुन १८ गतेबाट रिलिज हुन लागेको चलचित्र ‘अगस्त्य च्याप्टर– १’का बारेमा जानकारी दिँदै टिजर समेत प्रदर्शन गरिएको थियो ।

कलेजमा गएर उनीहरूले फ्यानलाई भेट्नुका साथै अगस्त्यको टिकट पनि बाँडेका थिए । टिजर हेरेका विद्यार्थीले अभिनेता सौगात मल्लको चरित्रमा देखिएको विविधताले मन जितेको प्रतिक्रिया दिएका थिए । टिजरको अन्तिममा मेसिनगन लिएर प्रस्तुत भएका नाजिर हुसेनको प्रभावशाली चरित्र र प्रमोद अग्रहरिको झलकले विद्यार्थीको ध्यान तानेको थियो ।

सौरभ चौधरीको लेखन तथा निर्देशन रहेको ‘अगस्त्य’ फागुन १८ गतेबाट प्रदर्शनमा आउनेछ ।