विराटनगर । विराटनगर–२ का सम्राट दास दुवै कान कम सुन्छन् । तर, पढाइमा तेज छन् । मनपर्ने विषय ‘म्याथ’ हो । यो सँगै चित्र पनि कोर्छन् । उनका चित्रका पात्र समाजका पपुलर व्यक्ति हुने गरेका छन् । 

उनी विराटनगरको लिलिपुट स्कुलमा कक्षा ५ मा पढ्छन् । बुधबार सरस्वती पूजाको दिन अरु साथीहरूभन्दा चाँडै विद्यालय पुगे । उनीहरूकै सहयोगमा आफूले कोरेका तस्बिर हार मिलाएर राखे । स्टल बनाए । अनि सबै तस्बिरमा मूल्यसूची राखे ।
 
सबैभन्दा अगाडि कोसी प्रदेशका मुख्यमन्त्री केदार कार्कीको तस्बिर थियो । त्यो तस्बिरको मूल्य नौ सय रुपैयाँ तोकिएको थियो । त्यही लहरमा काठमाडौं महानगरपालिकाका मेयर बालेन्द्र शाह (बालेन)को तस्बिर पनि थियो । ती तस्बिर उनले बिक्री गरे । यसबाट आएको पैसा आफ्नै लागि बचत गरी उपचारमा खर्च गर्ने योजना बनाएको बताए । उनीसँगै आमा कल्पना दास पनि थिइन् । साथीहरू पनि थिए ।
 
कल्पनाले भनिन्, “कोसीका मुख्यमन्त्रीज्यूले बालबालिकाको निःशुल्क उपचार गराउन सुरु गरेको समाचार उनले पढेका रहेछन् । एक दिन आफन्तको घरमा उहाँ आएको बेला भेटघाट पनि गरेका थिए । त्यही भएर उहाँको तस्बिर बनाउने योजना मलाइ सुनाएका थिए ।” पछि मुख्यमन्त्री कार्की र मेयर बालेनको तस्बिर घण्टौं मिहिनेत गरेर उनले बताएको कल्पनाले सुनाइन् । कार्कीले थालेको दश वर्षमुनिका बालबालिकाको निःशुल्क उपचार र बालेनको शैक्षिक अभियानबाट  सम्राट प्रभावित बनेको कल्पनाको भनाइ छ । कार्कीले बालबालिकामैत्री परिसरका लागि भन्दै चौर मासेर सर्टर बनाउने विद्यालयलाई प्रदेश सरकारले सहयोग नगर्ने पनि घोषणा गरेका छन् । 

सम्राटले चित्रकारिताको औपचारिक अध्ययन गरेका छैनन् । युट्युब नै उनको गुरु हो । कल्पनाका अनुसार छोराले समाजमा राम्रो काम गर्ने उदाहरणीय व्यक्तिको सूची बनाएर स्केच कोर्ने गरेका छन् । यसबाहेक जीवन, प्रकृति, देवीदेवता र अन्य विषय झल्कले तस्बिर पनि बनाउँछन् । 

विद्यालयका प्राचार्य चिरञ्जीवी तिम्सिनाले सम्राटको क्षमता कदर गर्दै विद्यालय प्रशासनले तस्बिरहरू प्रदर्शनीमा राखिदिएको बताए । “उनमा भएको क्षमतालाई आम मानिससम्म परिचित गराउन हामीले सहयोगीको भूमिका खेलेका हौँ,” तिम्सिनाले भने ।

सम्राटले विद्यालयबाट राम्रो सहयोग प्राप्त गरेको र शिक्षकहरूले समेत माया गर्ने गरेको सुनाए । उनले भने, “आज सरस्वती पूजाको दिन मैले बनाएको चित्र प्रदर्शनीमा राख्न सरहरूले नै सहयोग गर्नुभएको हो ।” सम्राटले बनाएका तस्बिर सरस्वती पूजा समारोहमा भाग लिन आएका अभिभावकहरूले खरिद गरिदिएका छन् । 

ऐच्छिक अंग्रेजीमा स्नातकोत्तर कल्पना पहिले शिक्षिका थिइन् । तर छोरा सम्राट फरक क्षमताको भएपछि उनकै लागि अहिले गृहिणी मात्र छिन् ।