काठमाडौं । कीर्तिपुर नगरपालिकामा ३१ हजार ११२ मतदाता छन् । भर्खरै सम्पन्न उपचुनावमा ०७९ को स्थानीय तह निर्वाचनभन्दा झन्डै १० हजार कम अर्थात् २१ हजार २९९ मत मात्र खस्यो ।

त्यसमा ५३१ मत बदर भयो । कुल सदर मत २० हजार ७६७ कायम भयो । राष्ट्रिय प्रजातन्त्र पार्टी (राप्रपा)का मेयर उमेदवार ध्रुव महर्जनले जम्मा ९९५ अर्थात् कुल सदर मतको ४.७९ प्रतिशत मात्र प्राप्त गरेसँगै उनको जमानत जफत भयो ।

अझ कीर्तिपुर त्यस्तो पालिका बन्यो, जहाँ राप्रपाले उपनिर्वाचन भएका ठाउँमध्ये सबैभन्दा बढी मत पायो । कीर्तिपुर–१ मा राप्रपाका वडाध्यक्षका उमेदवार सुरेन्द्रप्रसाद उप्रेतीले ६४ मत मात्र ल्याए । कीर्तिपुर–४ का वडाध्यक्ष उमेदवार राप्रपाकै विजेश बस्नेतले १६४ मत पाए ।

तीन हजार ११२ मत सदर भएको वडा नम्बर–४ मा बस्नेतको जमानत जफत भयो । एक हजार ६७४ मत सदर भएको कीर्तिपुर–१ मा ६४ भोट पाएका उप्रेतीकोे त झन् लाजमर्दो अवस्था देखियो । जमानत जफत भए पनि राप्रपाका निम्ति त्यही कीर्तिपुर देशका अरू पालिका र वडाभन्दा सम्मानजनक मत पाएको स्थान बन्न पुग्यो ।

कीर्तिपुरमा अरू दलभन्दा राप्रपाले पहिल्यै उमेदवारी घोषणा गरेको थियो । त्यसक्रममा राप्रपा अध्यक्ष राजेन्द्र लिङदेनले देशको अवस्था गणतन्त्रवादी दलहरूले बिगारेको आरोप लगाएका थिए । कीर्तिपुरवासीलाई भोटमार्फत व्यवस्था परिवर्तनको शंखघोष गर्न उनले आह्वान गरेका थिए । तर, आफैँले जित्ने घोषणा गरेका पालिकामा राप्रपाको जमानत जोगिएन ।

राप्रपाको अझ खराब अवस्था देखाउने पालिका बन्यो, मोरङको ग्रामथान गाउँपालिका । ग्रामथानमा कुल १८ हजार २०७ मत सदर भयो । यहाँ राप्रपाका अध्यक्ष उमेदवार दिनेशकुमार थान्दारले जम्माजम्मी ५५५ मत प्राप्त गरे । ३ प्रतिशत मत मात्र पाएका थान्दारको पनि जमानत जोगिएन ।

काठमाडौं महानगरपालिका–१६ को उपचुनावमा यसपटक कुल १० हजार ३७६ मत सदर भएको थियो । त्यहाँ राप्रपाका वडाध्यक्ष उमेदवार श्यामकृष्ण श्रेष्ठले ६२२ मत ल्याए, तर जमानत जोगिएन ।

उपचुनावमा पूर्वपञ्चबहुल राजतन्त्रको हिमायती दल राप्रपाको अवस्था देशभर यस्तै बनेको छ । मधेस प्रदेशको मुकाम रहेको धनुषाधाम–१ मा राप्रपाले २७ मत पायो । महोत्तरीको रामगोपालपुर नगरपालिका–२ मा राप्रपाले दुई मत पाएको छ ।

राप्रपा उमेदवारले ओखलढुंगाको मोलुङ–५ मा तीन, रौतहटको गढीमाई–८ मा चार, तेह्रथुमको लालीगुराँस–८ मा चार, सप्तरीको डाक्नेश्वरी–४ मा ६, गुल्मीको मुसिकोट–१ मा पाँच, जाजरकोटको कुशे गाउँपालिका–७ मा ६ मत पाए । 

राप्रपा अध्यक्ष लिङदेनको गृहजिल्ला झापाको कन्काई–६ मा राप्रपाका उमेदवार नारायण निरौलाले २६ मत पाएका छन् । त्यहाँ एक हजार ५०६ मत सदर भएको थियो ।

कुनै बेला राप्रपाको गढ मानिने हेटौँडा उपमहानगरपालिका–१२ मा उक्त पार्टीका वडाध्यक्ष उमेदवार प्रेमबहादुर भोलनले १७८ मत पाए । उनको पनि जमानत जफत भयो ।

राप्रपा नेताहरूले गणतन्त्रवादीको सरकारबाट नागरिक वाक्कदिक्क भइसकेको र व्यवस्थाकै विकल्प खोजिरहेको बताउँदै आएका छन् । विवेकशील साझा पार्टी छाडेर राप्रपाको वरिष्ठ उपाध्यक्ष बनेका रवीन्द्र मिश्रले त गणतन्त्रवादीका कारण देश नै जोखिममा परेको भन्दै मुलुक जोगाउन राजा र राजावादीहरू शक्तिमा फर्कनुपर्ने बहस चलाइरहेका छन् ।

तर, निर्वाचनको जनमतले गणतन्त्रवादीबीच मात्र प्रतिस्पर्धा देखाएको छ । देशका अधिकांश ठाउँमा कांग्रेस, एमाले र माओवादीबीच प्रतिस्पर्धा भयो । काठमाडौं–१६ मात्र जितेको रास्वपा पनि नवगणतन्त्रवादी दल हो ।

जनताले भोटै हालेनन् : राप्रपा
राप्रपा उपाध्यक्ष तथा संसदीय दलका उपनेता बुद्धिमान तामाङ उपचुनावमा जनताले भोटै नहाल्दा आफ्नो पार्टीको मत कम आएको जिकिर गर्छन् । “यसपटक जनताले भोट नै हालेनन् । म पनि एउटा पार्टीकै वरिष्ठ उपाध्यक्ष छु, तर जनता पार्टीहरूसँग वाक्कदिक्क छन्,” तामाङले बाह्रखरीसँग भने, “जनताले त डेलिभरी खोज्छ, शान्ति सुरक्षा खोज्छ, भ्रष्टाचार नियन्त्रण र सुशासन खोज्छ । त्यो नहुँदा जनता दल र हालको व्यवस्थाप्रति आक्रोशित छ ।”

यसपटक कार्यकर्ताको मात्र भोट आएको उनले तर्क गरे । “जसको पार्टी संगठन बलियो छ, उसका कार्यकर्ता र त्यससँग जोडिएका व्यक्तिले भोट हाले, अरूले भोटै हालेनन्,” उनले भने, ‘‘जति भोट प्राप्त भएको छ, राप्रपाले उपलब्धिका रूपमा लिएको छ ।’’