काठमाडौं । नेपाल प्रिमियर लिग (एनपीएल)मा पछिल्ला दुई खेलको हारले पूर्वेली टोली विराटनगर किंग्समाथि चर्को दबाब थपिएको थियो । दुवै खेलमा विराटनगमाथि तेर्सिएको सबैभन्दा ठूलो प्रश्न थियो– ब्याटिङ किन राम्रो हुन सकिरहेको छैन ?

प्रश्न स्वाभाविक पनि थियो । विराटनगर पहिलो खेलमा जनकपुर बोल्ट्सविरुद्ध १२७ र दोस्रो खेलमा सुदूरपश्चिम रोयल्सविरुद्ध ९२ रनमै समेटिएको थियो । दुवै खेलमा विराटनगर क्रमशः आठ विकेट र ९० रनले पराजित भएको थियो ।

त्यही दबाबबीच बुधबार प्रतियोगिताको तेस्रो खेलमा मैदान ओर्लिएको विराटनगरलाई यी र यस्तै प्रश्नको सटिक जवाफ दिन पनि जित आवश्यक थियो । र, विराटनगरले जवाफ दियो पनि । त्यो पनि राष्ट्रिय टिमका कप्तानसमेत रहेका रोहितकुमार पौडेल नेतृत्वको लुम्बिनी लायन्सविरुद्ध कीर्तिमानी जित निकाल्दै । 

कीर्तिपुरस्थित त्रिवि क्रिकेट मैदानमा सम्पन्न खेलमा ‘थ्रिलर’ खेलमा टस हारेर ब्याटिङमा आएको लुम्बिनीले निर्धारित २० ओभरमा सात विकेट गुमाएर १९१ रनको विशाल योगफल खडा गरेको थियो । जुन एनपीएलमा अहिलेसम्म कुनै पनि टिमले खडा गरेको अहिलेसम्मकै ठूलो योगफल हो । यसअघि, विराटनगरविरुद्ध नै सुदूरपश्चिमले १८२ रन बनाउँदै यो कीर्तिमान बनाएको थियो । 

तर, विराटनगरले १९२ रनको कीर्तिमानी लक्ष्य २०औँ ओभरको पाँचौ बलमा भेटायो, आठ विकेट गुमाएर । योसँगै विराटनगरले एनपीएलमा सबैभन्दा ठूलो लक्ष्य पूरा गर्ने कीर्तिमान बनाएको छ ।

पूर्वेली टोलीको यो जितमा नायक बने, ओपनर ब्याटर लोकेश बम । घरेलु क्रिकेटमा लोकेश लामो प्रहार गर्ने सक्ने क्षमताबाट परिचित छन् । उनले बुधबार आफ्नो स्वाभाविक शैली प्रस्तुत गरे पनि । ओपनिङमा आएका लोकेश १८औँ ओभरमा आउट हुनुअघि ७१ रनको अर्धशतकीय इनिङ खेले । यही प्रदर्शनबाट उनी खेलको ‘प्लेयर अफ द म्याच’समेत चुनिए ।

“एक ओपनरको रूपमा मेरो भूमिका सधैँ टिमलाई राम्रो सुरुआत दिने हुन्छ । पहिलो इनिङपछि म खेल जिताउँछु भन्ने कुरा गरिरहेको थिएँ । त्यो विश्वास राखिराखेको थिएँ,” लोकेशले जितपछिको भावना यसरी पोखे ।

लुम्बिनीविरुद्धको जितमा टिमसँगै लोकेशले पनि कीर्तिमानी ब्याटिङ गरे । टिमको खातामा ७१ रन थप्दा लोकेशले कुल नौ बाउन्ड्री प्रहार गरेका थिए । जसमा तीन चौका र ६ छक्का समावेश छन् । योसँगै लोकेश एनपीएलको एउटै खेलमा सबैभन्दा धेरै छक्का प्रहार गर्ने ब्याटरसमेत बने । उनले सुदूरपश्चिम रोयल्सका दीपेन्द्रसिंह ऐरी (विराटनगरविरुद्ध) र कर्णाली याक्सका शिखर धवन (काठमाडौं गुर्खाजविरुद्ध)लाई पछि पारेका हुन् । यी दुवैले यसअघि समान आफ्नो इनिङमा समान पाँच छक्का प्रहार गरेका थिए ।

अन्तिम ओभरको ‘थ्रिलर’

बुधबारको खेलमा लोकेश नै विराटनगरलाई जितसम्म डोहोर्‍याएका भने होइनन् । उनी १८औँ ओभरको चौथो बलमा आउट हुँदा विराटनगरलाई १४ बलमा अझै २९ रनको आवश्यकता थियो । १९औँ ओभरको दोस्रो बलमा र २०औँ ओभरको पहिलो बलमा विकेट गुमाउँदा विराटनगर १७९–८ को स्थितिमा थियो ।

विराटनगरलाई जितका निम्ति अन्तिम ओभरमा १५ रन आवश्यक थियो । लुम्बिनीबाट बलिङ गर्न आएका विवेक यादव निकै दबाबमा देखिए । उनले सुरुका दुई बल लगातार वाइड फ्याके । त्यसपछि उनले पहिलो आधिकारिक बलमा विराटनगरका कप्तान सन्दीप लामिछानेलाई आउट गरे । 

विराटनगरलाई जितका निम्ति अन्तिम पाँच बलमा १३ रन आवश्यक बन्यो । सन्दीपपछि ब्याटिङमा आएका क्रिस सोलले विवेकको दोस्रो बल डट खेले । सोलले तेस्रो बल छक्का प्रहार गर्दै टिमको दबाब कम गरे । यसपछि विराटनगरलाई अन्तिम तीन बलमा सात रन आवश्यक थियो । चौथो बलमा पनि बाउन्ड्री लगाउँदै सोलले चौका प्रहार गरे । दुई बलमा तीन रन आवश्यक हुँदा पाँचौँ बलमा पनि सोलले चौका प्रहार गरेपछि विराटनगरले रोमाञ्चक जित पक्का गर्‍यो ।

विरानगरको जितमा सोलले चार बलमै १४ रन बनाए । यसक्रममा उनले दुई चौका र एक छक्का प्रहार गरे । त्यसअघि मध्यक्रममा बसिर अहमेदले ४० रन बनाउनु पूर्वेली टिमको जितमा झनै महत्त्वपूर्ण सावित बन्यो । बसिरले २३ बलमा चार चौका र एक छक्का प्रहार गरेका थिए ।

पहिलो खेलमै हार बेहोरे पनि लुम्बिनीका कप्तान रोहितले जितको श्रेय विराटनगरका खेलाडीलाई दिन आनाकानी गरेनन् ।

“लोकेश र बीचमा बसिर जसरी ब्याटिङ गरे, श्रेय उनीहरूलाई जान्छ । यी दुईबीचको साझेदारीले खेल हामीबाट टाढा लाग्यो,” खेलपछि रोहितले भने ।

नेपालीमा एउटा चलनचल्तीको उखान छ– ‘ढिलो आयो, कडा आयो ।’ विराटनगरको हकमा यो धेरै हदसम्म लागु हुन्छ पनि । किनकि, टोलीले यसअघि दुई खेलमा फराकिलो हार बेहोरेको थियो । 

तर, बुधबारको कीर्तिमानी जितले यी दुवै हार छोपिसके । अब विराटनगरको यो जितलाई भन्न सकिन्छ, ‘ढिलो आयो तर, कीर्तिमानी आयो ।’