site stats
बाह्रखरी :: Baahrakhari
खेल
Global Ime bankGlobal Ime bank
कीर्तिमानी खेलमा लुम्बिनीविरुद्ध विराटनगरको रोमाञ्चक जित 

काठमाडौं । नेपाल प्रिमियर लिग (एनपीएल)मा बनेको कीर्तिमानी खेलमा विराटनगर किंग्सले लुम्बिनी लायन्सविरुद्ध दुई विकेटको रोमाञ्चक जित निकालेको छ ।

बुधबार कीर्तिपुरस्थित त्रिवि क्रिकेट मैदानमा सम्पन्न खेलमा लुम्बिनीले प्रस्तुत गरेको १९२ रनको लक्ष्य विराटनगरले १९.५ ओभरमा आठ विकेट गुमाएर पूरा गर्‍यो ।

यो एनपीएलमा कुनै पनि टिमले भेट्टाएको हालसम्मकै ठूलो योगफल हो । प्रतियोगितामा विराटनगरको यो पहिलो जित हो । यसअघि विराटनगर पहिलो खेलमा जनकपुर बोल्ट्ससँग आठ विकेट र दोस्रो खेलमा सुदूरपश्चिम रोयल्ससँग ९० रनले पराजित भएको थियो ।

Dabur Nepal
NIC Asia

विराटनगरलाई अन्तिम ओभरमा जितका निम्ति १५ रनको आवश्यकता थियो । लुम्बिनीबाट बलिङ गर्न आएका विवेक यादवले सुरुका दुई बल वाइड फ्याके । त्यसपछि उनले पहिलो आधिकारिक बलमा विराटनगरका कप्तान सन्दीप लामिछानेलाई आउट गरे । 

विराटनगरलाई जितका निम्ति अन्तिम पाँच बलमा १३ रन आवश्यक बन्यो । सन्दीपपछि ब्याटिङमा आएका क्रिस सोलले विवेकको दोस्रो बल डट खेले । तेस्रो बल छक्का प्रहार गरेपछि विराटनगरलाई अन्तिम तीन बलमा सात रन आवश्यक थियो । चौथो बलमा पनि बाउन्ड्री लगाउँदै सोलले चौका प्रहार गरे । दुई बलमा तीन रन आवश्यक हुँदा पाँचौँ बलमा पनि सोलले चौका प्रहार गरेपछि विराटनगरले रोमाञ्चक जित निकालेको हो । 

विराटनगरको जितमा उत्कृष्ट ब्याटिङ गरेका लोकेश बमले ७१ रन बनाए । उनले ४७ बलमा तीन चौका र ६ छक्का प्रहार गरे । लोकेशलाई १७.४ ओभरमा लुम्बिनीका रेमन सिमोन्ड्सले सन्दीप जोराबाट क्याच गराए । ७२–४ को स्थितिबाट लोकेशले पाँचौँ विकेटका निम्ति बसिर अहमेदसँग ७८ रनको साझेदारी गर्दै विराटनगरलाई १५० रनसम्म पुर्‍याएका थिए । १६.२ ओभरमा आउट हुनुअघि बसिरले २३ बलमा चार चौका एक छक्कासहित ४० रन बनाए । बसिरलाई दुर्गेश गुप्ताले बेन कटिङबाट क्याच गराए । 

अन्तिमसम्म अविजित रहेका क्रिस सोलले चार बलमा दुई चौका र एक छक्कासहित १४ रन बनाए । उनीसँग अविजित रहेका दीपक बोहराले आठ बलमा नौ रन जोडे । स्कोरबोर्डमा दुई रन हुँदा इस्मात आलमलाई गुमाएको थियो । इस्मात शून्यमै पभेलियन फर्किए । यसपछि ब्याटिङमा आएमा मार्टिन गप्टिल र ओपनर लोकेशले दोस्रो विकेटका निम्ति ६२ रनको साझेदारी गर्दै विराटनगरको इनिङ सम्हालेका थिए । आठौंँ ओभरको पहिलो बलमा दुर्गेश गुप्ताबाट बोल्ड हुनुअघि गप्टिलले १७ बलमा ६ चौकासहित २८ रन बनाए । 

यसबाहेक, प्रतिश जिसीले तीन बलमा एक छक्कासहित ६ रन बनाए । उनलाई १७.६ ओभरमा दुर्गेश गुप्ताले बोल्ड गरे । राजेश पुलामीले १० बल खेल्दा चार रनमात्रै थप्न सके । उनी नवौँ ओभरको तेस्रो बलमा साद बिन जफरबाट ‘कट एन्ड बोल्ड’ भए । लगत्तै अर्को बलमा जफरले विराटनगरका किर्टोनलाई ‘गोल्डेन डक’ पभेलियन फर्किए । लुम्बिनीका दुर्गेश गुप्ताले तीन विकेट लिए । चार ओभर बलिङ गरेका दुर्गेशले २१ रनमात्र खर्चिए । रेमन सिमोन्ड्स र साद बिन जफरको नाममा समान दुई विकेट रह्यो । विवेक यादवले एक विकेट लिए ।

पहिलो इनिङ : लुम्बिनीको कीर्तिमानी योगफल 
यसअघि टस हारेर ब्याटिङमा आएको लुम्बिनीले निर्धारित २० ओभरमा सात विकेट गुमाएर १९१ रनको योगफल बनाएको हो । मंसिर १५ गतेदेखि सुरु भएको प्रतियोगितामा कुनै पनि टिमले बनाएको यो हालसम्मकै सबैभन्दा ठूलो योगफल हो । लुम्बिनीले सुदूरपश्चिम रोयल्सको नाममा रहेको कीर्तिमान तोडेको हो । यसअघि सुदूरपश्चिम रोयल्सले विराटनगर किंग्सविरुद्ध नै १८२ रन बनाउँदै यो कीर्तिमान बनाएको थियो । 

लुम्बिनीका कप्तान रोहितकुमार पौडेलले ४६ रन बनाए । अर्धशतकबाट चार रनले चुकेका रोहितलाई १२.५ ओभरमा राजेश पुलामीले प्रतिश जिसीबाट क्याच गराए । रोहितले २९ बलमा चार चौका र दुई छक्का प्रहार गरे । ६४–२ को स्थितिबाट रोहितले टम मोरेससँग तेस्रो विकेटका निम्ति ३३ बलमा ६७ रनको आक्रामक साझेदारी गर्दै लुम्बिनीको इनिङ बढाएका थिए । 

१४औँ ओभरको चौथो बलमा रनआउट हुनुअघि मोरेसले १७ बलमा एक चौका र दुई छक्कासहित ३० रन प्रहार गरे । लुम्बिनीको खातामा १२ रन थपेका सन्दीप जोरा १६.२ ओभरमा रनआउट भए । उनले १३ बल खेले पनि बाउन्ड्री प्रहार गर्न भने सकेनन् । साद बिन जफरले १३ बलमा एक छक्कासहित १५ रन बनाए । सन्दीप लामिछानेले गरेको १९औँ ओभरको दोस्रो बलमा जफर मार्टिन गप्टिलबाट क्याच भएका थिए । सोही ओभरको चौथो बलमा बेन कटिङ पनि रनआउट भए । कटिङले ६ बलमा एक चौकासहित ६ रन बनाए । 

त्यसअघि लुम्बिनीले चौथो ओभरको पहिलो बलमा ओपनर आशुतोष घिरैयालाई रनआउटको रूपमा गुमाएको हो । ननस्ट्राइकमा रहेका आशुतोष रन लिन अघि बढेको स्थितिको फाइदा उठाउँदै विराटनगरका निकोलस किर्टोनले उत्कृष्ट ‘थ्रो’ गर्दै रनआउट गरे । आशुतोषले १५ रन बनाए । 

दोस्रो विकेट लुम्बिनीले आठौँ ओभरको दोस्रो बलमा अर्का ओपनर अर्जुन साउदलाई गुमाएको थियो । साउदलाई विराटनगरका इस्मात आलमले बोल्ड गरे । उनले लुम्बिनीको खातामा १७ रन थपे । अन्तिममा अविजित रहेका विवेक यादवले १९ रन बनाए । आक्रामक रूपमा प्रस्तुत भएका विवेकले सात बलमा तीन छक्का प्रहार गरे । रोमन सिमोन्ड्सले दुई रन बनाए । 

विराटनगरका कप्तान सन्दीप, इस्मात आलम र राजेश पुलामीले समान एक विकेट लिए । प्रतियोगितामा तेस्रो खेल खेलिरहेको विराटनगरबाट सन्दीपको यो पहिलो विकेट हो । यसबाहेक, विराटनगरले लुम्बिनीका चार ब्याटरलाई रनआउट गरेको थियो । प्रतियोगितामा लुम्बिनीको यो पहिलो खेल हो ।

Laminar Tiles Banner adLaminar Tiles Banner ad
NIBLNIBL
प्रकाशित मिति: बुधबार, मंसिर १९, २०८१  १६:२९
worldlinkworldlink
प्रतिक्रिया दिनुहोस्
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
Shivam Cement DetailShivam Cement Detail
सम्पादकीय
Hamro patroHamro patro