![‘क्यान इन्फोटेक २०२४’ सम्पन्न, प्रदेशस्तरीय प्रदर्शनीको तयारीमा महासंघ](https://12khari.top/uploads/posts/Can-info-(2)-1707811102.jpeg)
काठमाडौं । काठमाडौंको भृकुटीमण्डपमा आयोजित ‘क्यान इन्फोटेक २०२४’ सकिएको छ ।
कम्प्युटर एसोसिएसन नेपाल महासंघ (क्यान महासंघ)ले माघ २५ देखि २९ गतेसम्म इन्फोटेकको आयोजना गरेको थियो । सूचना तथा प्रविधि क्षेत्रको बृहत प्रदर्शनीका रूपमा रहेको क्यान इन्फोटेकको यो २९औँ संस्करण थियो ।
इन्फोटेकमा सरकारी अधिकारी, स्थानीय तहका जनप्रतिनिधिदेखि प्रदेशसभा, राष्ट्रियसभा र प्रतिनिधिसभाका सांसदहरू, विभिन्न राजनीतिक दल सम्बद्ध नेता, योजना आयोगका अधिकारीहरू, नीति निर्माता, राष्ट्रिय तथा अन्तर्राष्ट्रिय क्षेत्रका व्यवसायी, कलाकार, समाजसेवी, विद्यार्थी एवं सूचना प्रविधि क्षेत्रका व्यक्तिले अवलोकन गरेका थिए ।
क्यान महासंघका अध्यक्ष रणजीत पोदारले यस संस्करणको इन्फोटेक उत्साहजनक रूपमा सफल भएको र सकारात्मक प्रतिक्रिया प्राप्त भएको बताएका छन् ।
प्रदर्शनीमा करिब १५० स्टलको सहभागिता रहेको थियो । यसअन्तर्गत प्रदर्शनीकर्ता कम्पनीहरूले आफ्ना वस्तु तथा सेवा उपभोक्तामाझ प्रवर्द्धन गरेका थिए । कम्पनीहरूले आफ्ना उत्पादनमा ‘क्यान इन्फोटेक अफर’ दिँदै ३० देखि ७० प्रतिशतसम्म छुट प्रदान गरेका थिए ।
राजधानीमा राष्ट्रियस्तरको क्यान इन्फोटेक सम्पन्न भएसँगै अब प्रदेशस्तरीय प्रदर्शनी हुने क्यानका महासचिव चिरञ्जीवी अधिकारीले बताए । सन् २०२४ भित्र सातै प्रदेशमा क्यान इन्फोटेक गर्ने योजनासहित तयारी तीव्र पारिएको उनले बताए ।