लखनऊ । भारतको लखनऊको यातायात नगर क्षेत्रस्थित एउटा भवन भत्कँदा चारजनाको मृत्यु भएको छ । २८ जनाको उद्धार गरिएको छ । धेरैजना फसेका छन् ।

लखनऊका जिल्ला मजिस्ट्रेट सूर्यपाल गंगवारले चारजनाको मृत्यु भएको पुष्टि गरेका छन् । “हालसम्म २८ जनाको उद्धार गरिएको छ । राष्ट्रिय प्रकोप प्रतिकार्य बल (एनडीआरएफ), राज्य विपद् प्रतिक्रिया कोष (एसडीआरएफ), अग्निनियन्त्रक र प्रहरीले घटनास्थलमा उद्धार कार्य गरिरहेका छन्,” लखनऊ नगरपालिका आयुक्त इन्द्रजित सिंहले एएनआईलाई भने ।

प्रमुख अग्निनियन्त्रक अधिकृत (सीएफओ) मंगेश कुमारले भत्किएको भवनमा अझै धेरै मानिस फसेको आशंका गरिएको बताए । “अझै धेरै मानिस फसेको भनिएको छ । फसेकाहरूको यकिन संख्या थाहा हुन सकेको छैन,” कुमारले भने ।

अलपत्र परेकाहरूको उद्धार कार्य जारी छ । दमकल विभाग, एनडीआरएफ र एसडीआरएफ टोली घटनास्थलमा छन् । घाइतेलाई अस्पताल पठाउने काम भइरहेको छ । थप विवरण आउन बाँकी छ । रासस/एएनआई