काठमाडौं । अखिल नेपाल फुटबल संघ (एन्फा)ले अनुशासनका कारण फिफा सहायक रेफ्री राधिका शाक्यलाई यू–१९ महिला साफ च्याम्पियनसिप खेलाउने रेफ्रीबाट नाम फिर्ता लिएको बताएको छ ।

बंगलादेशमा फेब्रुअरी २ देखि हुने साफ यू–१९ महिला च्याम्पियनसिपका लागि एन्फाले साफलाई नेपालको तर्फबाट दुई रेफ्री शाक्य र अञ्जना राईको नाम पठाएको थियो । तर, बुधबार प्रतियोगिताका लागि राई नेपाली टिमसँगै ढाका प्रस्थान गरे पनि शाक्य भने विमानस्थलबाट फर्किइन् । विमानस्थल पुग्दा आफ्नो नाम काटिएको जानकारी पाएपछि शाक्य फर्किन बाध्य भएकी थिइन् । 

एन्फाका प्रवक्ता सुरेश शाहले भने बिहीबार अनुशासनका कारण शाक्यको नाम फिर्ता लिएको बताए ।

• बंगलादेश जाने फिफा सहायक रेफ्री राधिका शाक्य विमानस्थलबाट फिर्ता 

“एन्फाले दुई रेफ्रीको नाम पठाएको थियो । त्यसमध्ये राधिका शाक्यको नाम फिर्ता लिएका हौँ । अनुशासनको कारण एन्फाले शाक्यको नाम फिर्ता लिएको हो,” प्रवक्ता शाहले बाह्रखरीसँग भने ।

तर, विमानस्थलबाटै फर्किएकी शाक्यले बिदाइ कार्यक्रममा एन्फा अध्यक्ष पंकजविक्रम नेम्वाङसँग जवाफ फर्काएका कारण आफ्नो नाम हटाइएको बताएकी थिइन् । 

“म बिदाइ कार्यक्रम समाप्त भइसक्यो भन्ने बुझेर तल बसेँ । तर, खेलाडीहरू भने फोटो खिच्दै थिए । कार्यक्रमपछि अध्यक्षज्यू तल आएर तँ नबोल् भन्नु भयो । मैले सरलाई त्यहाँ किन नबोल्ने भनेकी थिएँ । सायद त्यही कारण मेरो नाम काटिएको हुनसक्छ । तर, वास्तविक कारण के हो थाहा छैन,” बुधबार फिफा सहायक रेफ्री शाक्यले बाह्रखरीसँग भनेकी थिइन् ।