काठमाडौं । साफ यू–१९ महिला च्याम्पियन खेलाउन बंगलादेश जाने तयारीमा रहेकी फिफा सहायक रेफ्री राधिका शाक्यलाई विमानस्थलबाटै फर्काइएको छ ।

बंगलादेशमा हुने प्रतियोगिताका लागि अखिल नेपाल फुटबल संघ (एन्फा)को तर्फबाट अञ्जना राई र राधिका शाक्यलाई रेफ्रीका निम्ति ढाका जाने तय भएको थियो । प्रतियोगिताका लागि एन्फाले सोमबार नेपाली युवा टिमलाई बिदाइ गर्दा राई र शाक्यलाई पनि बिदाइ गरेको थियो । तर, त्यसको दुई दिनपछि बुधबार नेपाली टिम र रेफ्री राई बंगलादेश प्रस्थान गर्दा शाक्यलाई भने विमानस्थलबाटै फर्काइएको छ । 

“मेरो नाम क्यान्सिल भयो भन्ने थाहै थिएन । विमानस्थल पुगेपछि अञ्जना दिदीले तिम्रो नाम नै छैन भन्नु भएपछि म फर्किएँ,” फिफा सहायक रेफ्री शाक्यले बाह्रखरीसँग भनिन् ।

शाक्यले बिदाइ कार्यक्रममा एन्फा अध्यक्ष पंकजविक्रम नेम्वाङसँग सामान्य भनाभन जस्तो परिस्थिति बनेको भए पनि किन नाम हटाइयो भन्नेबारे जानकारी नभएको बताइन् ।

“किन एयरपोर्टबाट फर्काइयो भन्ने स्पष्ट कुरा थाहा छैन । सोमबार भएको विदाइ कार्यक्रमका क्रममा म एकछिन बाहिर निस्किएकी थिएँ । त्यसैले हुनसक्छ । त्यसबेला कार्यक्रमपछि अन्तिममा फोटोसुट चलिरहेको थियो,” शाक्यले थपिन्, “म कार्यक्रम समाप्त भइसक्यो भन्ने बुझेर तल बसेँ । तर, खेलाडीहरू भने फोटो खिच्दै थिए । कार्यक्रमपछि अध्यक्षज्यू तल आएर तँ नबोल् भन्नु भयो । मैले त्यहाँ किन नबोल्ने भनेकी थिएँ । सायद त्यही कारण हुनसक्छ । तर, वास्तविक कारण के हो थाहा छैन ।”

फेब्रुअरी २ देखि सुरु हुने प्रतियोगिताका लागि नेपाली टिम आज बंगलादेश प्रस्थान गरेको छ । नेपाली टिमले बालगोपाल साहुखलको प्रशिक्षण र सारा महर्जनको कप्तानीमा प्रतियोगिता खेल्नेछ ।

प्रतियोगिताको यस संस्करणमा नेपालसँगै बंगलादेश, भारत र भुटान सहभागी छन् । सिंगल राउन्ड रोविन लिग पद्दतिमा हुने प्रतियोगिताको शीर्ष दुई टिम उपाधिका लागि खेल्नेछन् ।

नेपालले फेब्रुअरी २ मा घरेलु टिम बंगलादेशविरुद्ध खेल्दै प्रतियोगिताको सुरुआत गर्नेछ । दोस्रो खेल नेपालले फेब्रुअरी ४ मा भुटानविरुद्ध खेल्नेछ । 

नेपालले लिग चरणको अन्तिम खेलमा भारतसँग फेब्रुअरी ६ मा खेल्नेछ । प्रतियोगिताको फाइनल खेल फेब्रुअरी ८ मा हुने तालिका छ ।

यसबारे एन्फा महासचिव किरण राईसँग जानकारी लिन खोज्दा उनी प्रवक्ताबाट बुझ्नु पर्ने भन्दै पन्छिए । एन्फा प्रवक्ता सुरेश शाहसँग सम्पर्क गर्न खोज्दा उनले फोन उठाएनन् ।