काठमाडौ । सूर्य नेपाल गल्फ टुर २०२३–२४ अन्तर्गत सिजनको दोस्रो प्रतियोगिता सूर्य नेपाल एनपीजीए म्याच प्ले बुधबारदेखि रोयल नेपाल गल्फ क्लबमा सुरु हुने भएको छ ।

सिजनको कुल आठमध्ये यो प्रतियोगितामा गत सिजन‌ अर्डर अफ मेरिटमा पर्न सफल उत्कृष्ट १६ खेलाडीले खेल्न पाउने छन् । तर, यसपटक नेपाल नम्बर एक शुक्रबहादुर राईसँगै उत्कृष्ट १६ मा पर्ने चार खेलाडीले सहभागिता जनाउने छैनन् । यही कारण अर्डर अफ मेरिटको उत्कृष्ट २० सम्म पर्न सफल खेलाडीले यो प्रतियोगितामा दाबेदारी प्रस्तुत गर्ने छन् ।

शुक्रसँगै १४औँ वरीयताका टंकबहादुर राई, १५औँ वरीयताका बलभद्र राई र १६औँ वरीयताका कमल तामाङले व्यक्तिगत कारण नखेल्ने भएका हुन् ।

चार खेलाडीले नाम फिर्ता लिँदा अर्डर अफ मेरिटमा दोस्रो स्थानमा रहेका भुवन नगरकोटी यो प्रतियोगिताका टप सिडेड खेलाडीको रूपमा रहने छन् । १७औँ वरीयताका दीपक मगर, १८औँ वरीयताका तोरण विक्रम शाही, १९औँ वरीयताका प्रदीप कुमार लामा र २०औँ वरीयताका रामकृष्ण श्रेष्ठले म्याच प्लेमा स्थान बनाएका छन् ।

म्याच प्लेको ड्र अनुसार भुवन नगरकोटीले पहिलो चरणमा २०औँ वरीयताका रामकृष्ण श्रेष्ठसँग खेल्नेछन् । तेस्रो वरीयताका नीरज तामाङको सामना १९औँ वरीयताका प्रदीप कुमार लामाले गर्नेछन् । डिफेन्डिङ च्याम्पियन तथा चौथो वरीयताका दिनेश प्रजापतिले १८औँ वरीयताका तोरण विक्रम शाहीसँग खेल्नेछन् । यस्तै १७औँ वरीयताका दीपक मगरले पाँचौँ वरीयताका जयराम श्रेष्ठलाई प्रतिद्वन्द्वीको रूपमा पाएका छन् ।

यसैगरी पहिलो चरणकै अर्को खेलमा छैटौँ वरीयताका सञ्जय लामा र १३औँ वरीयताका शिवराम पौडेलबीच प्रतिस्पर्धा हुने छ । सातौँ वरीयताका रवि खड्काको सामना १३औँ वरीयताका रमेश अधिकारीले गर्नेछन् । अर्को खेलमा आठौँ वरीयताका रामे मगर र ११औँ वरीयताका सूर्य प्रसाद शर्माबीच क्वार्टरफाइनल प्रवेशका लागि प्रतिस्पर्धा हुने छ । यस्तै नवौँ वरीयताका धनबहादुर थापा र १०औँ वरीयताका भुवन कुमार रोक्काले पहिलो चरणको खेलमा एक अर्काको सामना गर्ने छन् ।

पहिलो चरणका विजेता आठ खेलाडी क्वाटरफाइनलमा प्रवेश गर्ने छन् । क्वाटरफाइनल खेलहरू बिहीबार हुने छन् । सेमिफाइनल शुक्रबार हुने छ । पहिलो चरण, क्वाटरफाइनल, सेमिफाइनल र तेस्रो स्थानको खेल १८ होलको हुने छ । शनिबार हुने फाइनल खेल भने ३६ होलको हुनेछ ।

खेलाडीहरूले कुल दुई लाख ५० हजार नगद पुरस्कारका लागि प्रतिस्पर्धा गर्नेछन् । पहिलो चरणमा पराजित हुने आठ खेलाडीहरूले जनही ६ हजार तथा क्वाटरफाइनलमा पराजित चार खेलाडीले ११ हजार प्राप्त गर्नेछन् । विजेताले ६० हजार प्राप्त गर्दा दोस्रो हुने खेलाडीले ४२ हजार तथा तेस्रो र चौथो हुने खेलाडीहरूले क्रमश ३२ हजार र २४ हजार प्राप्त गर्नेछन् ।

नेपाल पीजीएका अध्यक्ष रविन्द्रमान श्रेष्ठले  व्यावसायिक गल्फमा निरन्तर सहयोग गरेकोमा प्रमुख प्रायोजक सूर्य नेपाल प्रालिलाई धन्यवाद दिए । उनले भने, “सूर्य नेपाल प्रालिको सहयोग बिना यो टुर यहाँसम्म आउन सक्ने थिएन । नेपालमा गल्फ क्रमशः विकास भइरहेकोछ र भोलिदेखि सुरु हुने सूर्य नेपाल म्याच प्ले प्रतिस्पर्धात्मक हुनेछ भन्ने विश्वास लिएको छु ।”