काठमाडौं । प्रधानमन्त्री शेरबहादुर देउवाले कम्युनिष्ट नेताहरुले भने जस्तो शासन आएमा हालसम्मका आन्दोलन र क्रान्तिहरुका माध्यमबाट प्राप्त सबै नागरिक हक अधिकार गुम्ने बताएका छन् ।

२०४६ सालको जनआन्दोलनका कमाण्डर तथान नेपाली कांग्रेसका सर्वोच्च नेता लौहपुरुष गणेशमानसिंहको १०२ औं जन्मजयन्तिको अवसरमा शुक्रबार काठमाडौंमा आयोजित कार्यक्रममा उनले सो कुरा बताएका हुन् ।

प्रधानमन्त्री देउवाले गणेशमान सिंह सहित नेपाली कांग्रेसका नेताहरुले आफ्नो जीवनको पर्वाह नगरीकन नागरिक हक–अधिकारका लागि जीवनभर संघर्ष गरेको कारण नेपाली जनताले अहिले निर्वाध रुपमा मौलिक हक प्रयोग गर्न पाएको उल्लेख गरे ।

नेपाली कांग्रेसको नेतृत्वमा भएको २००७ सालको जनक्रान्तिले राणा शासनको अन्त गराई नेपालमा प्रजातन्त्र ल्याएको प्रसंग उल्लेख गर्दै उनले लोकतान्त्रिक पद्धतिको विकासको लागि पहिलो निर्वाचन गराउन कांग्रेसले झण्डै ८ बर्ष राजासंग संघर्ष गर्न परेको पनि बताए ।