काठमाडौं । संखुवासभाको सदरमुकाम खाँदबारी बजारमा एक घर जलेर नष्ट भएको छ ।

आइतबार राति खाँदबारी १ स्थित नेपाली सेनाका ब्यारेकनजिकै शुकमाया राईको घरमा आगलागी हुँदा घर पूर्ण रुपमा जलेर नष्ट भएको हो । लक्ष्मीपूजा गरेको दियोबाट आगो सल्केर आगलागी भएको जिल्ला प्रहरी कार्यालयले जनाएको छ ।

राति करिब ११ः४६ बजे सुतिरहेको अवस्थामा पूजा गरेको कोठाबाट आगो लाग्न सुरु भएको प्रहरीले जनाएको छ । पूजा कोठाबाहेकको अर्कै कोठामा सुतेकोले आगो फैलिसकेपछि मात्र थाहा पाएकोले कुनै पनि सामान निकाल्न नसकिएको परिवार स्रोतले जनाएको छ ।

घटना थाहा पाएलगत्तै नेपाली सेना, नेपाल प्रहरी र स्थानीयले आगो नियन्त्रण गर्न खोजे पनि घर पूर्ण रुपमा जलेको छिमेकी नरेन्द्र राईले जानकारी दिए । राईको काठ र टिनबाट बनाइएको एकतले घर थियो ।