काठमाडौं । मुख्य प्रशिक्षक जर्ज भिल्डाबाहेक स्पेनलाई महिला विश्वकपको उपाधि जिताएका सबै प्रशिक्षण स्टाफले राजीनामा दिएका छन् ।

विश्वकपको उपाधिपछि खेलाडीलाई चुम्बन गरेको कारण स्पेनिस फुटबल महासंघका अध्यक्ष लुइस रुबिलेसलेबारे चर्को विवाद भइरहँदा विश्वकपको उपाधि दिलाउन महत्वपूर्ण भूमिका निभाएका सहायक प्रशिक्षकहरु मोन्ट्से टोम, हेभियर लेर्ज र एगेनियो गोन्जालेज मार्टिनेजसँगै फिजियो ब्लान्का रोमेरो मोरालिडा र गोलकिपर प्रशिक्षक कार्लोस सान्जेचले पदबाट राजीनामा दिएका हुन् ।

यस्तै, विभिन्न उमेर समूहका राष्ट्रिय टिममा रहेका अन्य ६ अफिसियलहरुले पनि राजीनामा दिएका छन् ।

विश्वकपको उपाधिपछि पुरस्कार वितरण समारोहमा फरवार्ड जेनी हर्मोसोको ओठमा चुम्बन गरेका कारण स्पेनिस फुटबल महासंघले अध्यक्ष रुबिलेसलाई शनिबार निलम्बन गरेको छ ।

“स्पेनिस फुटबल संघका अध्यक्षले देखाएको आचरणको दृढतापूर्वक निन्दा गर्दछौँ । अध्यक्षको अस्वीकार्य मनोवृत्ति र भनाइलाई ध्यानमा राख्दै हामीले आफ्नो कर्तव्यबाट मुक्त हुने निर्णय गरेका छौँ,” राजीनामा दिएका अफिसियलले जारी गरेको विज्ञप्तिमा उल्लेख छ ।

फाइनलमा हर्मोसोलाई गरेको चुम्बनले विवादमा तानिएपछि फिफाको अनुसन्धान कमिटीले समेत अध्यक्ष रुबिलेसलाई ९० दिनका लागि अन्तर्राष्ट्रिय क्रियाकलापबाट निलम्बन गरेको छ ।