काठमाडौं । चन्द्रा भण्डारी र अमिषा कार्कीको ह्याट्रिकप्रेरित विभागीय टोली त्रिभुवन आर्मी क्लबले राष्ट्रिय महिला लिग–२०२४ मा रौतहटको चन्द्रपुर नगरपालिकाविरुद्ध १०–० को फराकिलो जित निकालेको छ ।

शुक्रबार सातदोबाटोस्थित एन्फा मुख्यालयमा सम्पन्न खेलमा आर्मीलाई जित दिलाउन चन्द्रा र अमिषाले ह्याट्रिक गरे । यस्तै, हिमा चौधरी, दीपा शाही, गोलकिपर अञ्जना रानामगर र शर्मिला थापामगरले समान एक गोल थपे ।

आर्मीले पहिलो हाफमा पाँच र दोस्रो हाफमा पाँच गोल थपेको हो । जितसँगै सात खेलबाट १६ अंक जोडेको आर्मी तालिकाको दोस्रो स्थानमा यथावत् छ । समान खेलबाट सात अंक जोडेको चन्द्रपुर तालिकाको छैटौँ स्थानमा छ । यसअघि आजै भएको पहिलो खेलमा अर्को विभागीय टोली एपीएफ क्लबले कोसी प्रदेशविरुद्ध ८–० को जित निकालेको थियो ।