काठमाडौं । चन्द्रपुर नगरपालिकाका मुख्य प्रशिक्षक पारस चौधरीले त्रिभुवन आर्मी क्लबकी गोलकिपर अञ्जना रानामगरले पेनाल्टी प्रहार गर्दा आफूहरूले अपमानित महसुस गरेको बताएका छन् ।

सातदोबाटोस्थित एन्फा मुख्यालयमा जारी राष्ट्रिय महिला लिगमा शुक्रबार आर्मीले चन्द्रपुरविरुद्ध १०–० को जित निकाल्दा गोलकिपर अञ्जनाले टिमका लागि छैटौँ गोल गरेकी थिइन् । खेलको ६७औँ मिनेटमा पाएको पेनाल्टीमा गोलकिपर अञ्जनाले गोल गरेकी हुन् । पेनाल्टी प्रहारका लागि अञ्जना जानुअघि नै चन्द्रपुर ५–० ले पछि परेको थियो । अञ्जना चन्द्रपुर नगरपालिकाकै उत्पादन हुन् ।

आर्मीमा आवद्ध हुनुअघि अञ्जनाले चन्द्रपुरको गोलपोस्ट सम्हालेकी थिइन् । खेलपछि चन्द्रपुरका प्रशिक्षक चौधरीले आफ्नो पूर्वक्लबविरुद्ध गोलकिपर अञ्जना पेनाल्टी प्रहारका निम्ति अघि सर्दा आफूहरूले हेपेको जस्तो महसुस गरेको प्रतिकृया दिए । “हाम्रो टिम ५–० ले पछि थियो । त्यस्तो बेला आर्मीका गोलकिपर पेनाल्टी प्रहारका लागि आउँदा कमजोर टिम भनेर हेपेको जस्तो फिल भयो । उनी पनि चन्द्रपुरबाटै यहाँसम्म आएकी हुन् । आफ्नो पूर्वटिम यस्तो गर्दा अपमानित भएको महसुस गर्यौँ,” प्रशिक्षक चौधरीले भने ।

आर्मीका प्रशिक्षक चुनबहादुर थापाले भने फरवार्ड चन्द्रा भण्डारीले पेनाल्टी प्रहारमा आत्मविश्वास नदेखाउँदा अञ्जना प्रहारका लागि गएको बताए । “पेनाल्टी पाएपछि चन्द्राले कन्फिडेन्ड देखाइनन् । त्यसैले गोलकिपर अञ्जना कन्फिडेन्डसाथ पेनाल्टी प्रहारका लागि अघि बढेकी हुन्,” खेलपछि थापाले भने ।