काठमाडौं । अमेरिकी टेक्नोलोजी कम्पनी माइक्रोनले चीन स्थित आफ्नो प्लान्टमा ७८ अर्ब रुपैयाँ भन्दा बढी लगानी गर्ने भएको छ । गत मे महिनामा चीनले महत्वपूर्ण पूर्वाधारमा यो कम्पनीका चिप प्रयोग गर्न रोक लगाएको थियो ।

चीनले त्यतिबेला साइबर सुरक्षाको जोखिम रहेको भन्दै देशका सरकारी निकायलाई माइक्रोनले उत्पादन गर्ने चिप प्रयोग नगर्न आदेश दिएको हो । यो कदमलाई अमेरिकाले चिनियाँ कम्पनीहरूमाथि लगाएको प्रतिबन्धको प्रतिक्रियाका रूपमा पनि हेरिएको थियो ।

तर, चिनियाँ प्रतिबन्धका बावजुद माइक्रोनले त्यहाँ ६० करोड अमेरिकी डलर भन्दा बढी लगानी गर्ने घोषणा गरेको हो ।

• अमेरिकी चिप कम्पनीमाथि चीनले लगायो प्रतिबन्ध

माइक्रोन अमेरिकाको सबैभन्दा ठूलो मेमोरी चिप निर्माता हो । कम्पनीले आगामी वर्षमा चीनको मध्य सहर सियानमा अवस्थित आफ्नो प्याकेजिङ प्लान्टमा एसेम्बलिङ लाइन थप्न र उपकरण खरिद गर्ने यो लगानी गर्ने बताएको छ ।

यसले ५०० रोजगारी सिर्जना गर्ने कम्पनीले चिनियाँ सामाजिक सञ्जाल प्लेटफर्म विच्याटमा घोषणा गरेको छ । यससँगै चीनमा माइक्रोन कम्पनीमा कुल रोजगारी संख्या चार हजार ५०० पुग्ने छ ।