काठमाडौं । प्रस्तावित प्रधानन्यायाधीश हरिकृष्ण कार्कीले नातावाद, संरक्षणवादले न्यायाधीश नियुक्तिमा प्रभाव पारेको बताएका छन् । अहिले आफूहरूले न्यायाधीश नियुक्तिको निर्देशिका बनाएर काम गरिरहेको पनि उनले बताए ।
शुक्रबार सिंहदरबारमा बसेको संसदीय सुनुवाइ समितिको बैठकमा सांसदले सोधेका प्रश्नको जवाफमा उनले अब आफूहरू न्यायाधीश नियुक्तिको अन्तिम तयारीमा रहेको बताए ।
“न्यायाधीश नियुक्त विषयमा भ्रष्टाचार भन्ने शब्दमा – नातावाद, कृपावादले, संरक्षणवादले नियुक्तिमा प्रभावित पारेको छ,” उनले भने ।
सर्वोच्च अदालतमा न्यायाधीश रिक्त हुनुभन्दा एक महिनाअघि नै पदपूर्ति गर्नुपर्ने भए पनि विभिन्न कारणले सम्भव नभएको उनले बताए । त्यसमा राजनीतिक कारण पनि जोडिएको उनको भनाइ छ ।
“म समेत गरेर साउनमा सातजना रिक्त हुन्छ । ६ जना नियुक्त गर्ने अवस्थामा छौँ र चाँडो भन्दा चाँडो गर्नुपर्छ,” उनले भने ।