काठमाडौं । नेपाली राष्ट्रिय क्रिकेट टिमका कप्तान रोहितकुमार पौडेलले सम्भावना बोकेका धेरै खेलाडी रहेकाले ट्वान्टी–२० विश्वकपका निम्ति अन्तिम १५ जना छान्न चुनौतीपूर्ण हुने बताएका छन् । कीर्तिपुरस्थित त्रिवि क्रिकेट मैदानमा शनिबार वेस्ट इन्डिज ‘ए’विरुद्ध कप्तानी इनिङ खेल्दै जित दिलाएपछि पत्रकार सम्मेलनमा रोहितले यस्तो बताएका हुन् ।

सानदार जित : सात तस्बिर

आयरल्यान्डसँगको खेलबाटै सबै खेलाडीमा राम्रो क्षमता देखिएको उनले उल्लेख गरे । सबै खेलाडीमा ‘रिप्लेसमेन्ट’ गर्न सक्ने क्षमता रहेको उनले बताए । त्यसैले ट्वान्टी–२० विश्वकपका निम्ति उत्कृष्ट १५ खेलाडी छान्न चुनौती हुने उनको भनाइ थियो ।

उनले क्षमतावान् खेलाडी धेरै रहेको भन्दै समग्रमा सबैको प्रदर्शन राम्रो रहेको बताए । आउने दिनमा राम्रो प्रदर्शन गर्नेहरूबाट उत्कृष्ट १५ खेलाडी विश्वकपका निम्ति छानिने कप्तान रोहितको विश्वास छ ।

उनले शनिबार शतकीय इनिङ खेल्छु नै भन्ने योजनामा नरहेको सुनाए । आफूले बलमा ध्यान दिँदै सोहीअनुरूप ब्याटिङ गरेको उनले बताए । आज आफ्नो दिन थियो जस्तो लागेको पनि उनले उल्लेख गरे ।

एउटा खेलाडीले राम्रो गर्न सके टिममा आत्मविश्वास बढ्छ भन्नेबारे प्रशिक्षक मोन्टी देसाईसँग छलफल हुने गरेको उनले बताए । आजको आफ्नो इनिङले टिममा आत्मविश्वास बढ्ने उनले आशा व्यक्त गरे ।

“ओमानसँगको खेलबाट निराश थियौँ । त्यहाँबाट अगाडि बढ्न आवश्यक थियो । त्यो खराब दिन सोचेको भए आजको प्रदर्शन सम्भव थिएन । सबैले आ–आफ्नो जिम्मेवारीअनुरूपमा गरेँ,” उनले भने ।

नेपाली टिमका प्रशिक्षक मोन्टी देसाईले ओमान भ्रमणमा आशातित प्रदर्शन गर्न नसकिएको उल्लेख गर्दै त्यसको जिम्मेवारी आफूले लिने बताए । आज रोहितले राम्रो प्रदर्शन गरेको उनले उल्लेख गरे । पछिल्लो १५ महिनामा रोहितले उत्कृष्टमध्ये एक प्रदर्शन गरेको प्रशिक्षकको बुझाइ छ ।

उनले एउटा खेलबाट कोही पनि राम्रो र नराम्रो भन्न नसकिने पनि स्पष्ट पारे । यो खेलले नेपाली टिममा आत्मविश्वास बढाउने उनले आशा व्यक्त गरे ।

वेस्ट इन्डिजका प्रशिक्षक फ्लोयड रेइफरले आफ्नो टिमले आउँदा खेलमा राम्रो प्रदर्शन गर्ने आशा व्यक्त गरे । शनिबार आफ्नो टिमले राम्रो सुरुआत गरे पनि त्यसलाई सदुपयोग गर्न नसकेको उनले बताए । न्युज एजेन्सी नेपाल