काठमाडौं । मन्त्रिपरिषद् विस्तारहुँदा कांग्रेसभित्र शेखर कोइराला समूह अडानबाट पछि हटेको छ । गएको चैत १७ मा समूहले सम्मानजनक भाग नपाएको भन्दै सरकारमा नगएको समूहले पुरानै भागमा चित्त बुझाएको छ ।  

१७ चैतमा सातौँपटक सरकार विस्तार हुँदा नेपाली कांग्रेसबाट ४ जनामात्र मन्त्रीले मात्र शपथ लिएका थिए । पार्टीले भागमा पाएको आठै जना मन्त्रीलाई सोही दिन शपथ गराउने तयारी गरेको थियो । तर, शेखर समूहको अवरोधका कारण चार जना मन्त्रीले मात्र शपथ लिनुपरेको थियो । 

सभापति शेरबहादुर देउवाले ८ मध्ये ६ मन्त्रालय आफूसँग राखेर २ मन्त्रालय मात्र समूहलाई भाग लगाएका थिए । समूहबाट पार्टी उपसभापति तथा सांसद धनराज गुरुङ र नेता शेखर कोइरालाको विश्वापात्र मोरङ जिल्ला सभापति समेत रहेका सांसद डिगबहादुर लिम्बुको नाम फाइनल भइसकेको थियो । समूहले जीवन परियार वा बद्री पाण्डेमध्ये एकलाई मन्त्री बनाउने भन्दै थप एक मन्त्रालय माग गरेको थियो । महामन्त्री गगन थापाले चाहिँ प्रदीप पौडेललाई मन्त्री बनाउन चाहेका थिए ।

त्यसपश्चात् समूहका नेता शेखर कोइरालाले सभापति शेरबहादुर देउवासँग संवाद गरेका थिए । उपनिर्वाचनमा भएको गठबन्धनमा असन्तुष्टि जनाउँदै जनमत पार्टीले खानेपानी मन्त्रालय छाडेपछि त्यो मन्त्रालय कांग्रेसले लिने र समूहलाई तीन मन्त्री दिने शेखर कोइरालासँगको भेटमा सभापति शेरबहादुर देउवाले आश्वासन दिएका थिए ।

सोहीअनुसार शेखरले आफ्नो सम्पर्क कार्यालय बालुवाटारमा आफूनिकट नेता तथा सांसदहरूलाई ब्रिफिङ पनि गरेका थिए । 

उक्त ब्रिफिङमा महामन्त्री गगन थापाले पनि तीन मन्त्री र एक राज्यमन्त्री गरेर चार जना समूहले पाउने र सोही अनुसार मन्त्री पठाउने बताएका थिए । साथै उपनिर्वाचन पश्चात् मन्त्री पठाउने र शपथ गराउने समूहका नेता कोइराला र महामन्त्री थापाले ब्रिफिङ गरेको बैठकमा सहभागी नेताहरू बताउँछन् । 

सम्माजनक भागबण्डा नपाएको भन्दै १७ गते शपथ ग्रहणबाट पछि हटेको शेखर समूह वैशाख २० अर्थात् आज विस्तार भएको मन्त्रिपरिषद्मा भने पुरानै भागवण्डामा चित्त बुझाएर सरकारमा गएको छ । 

प्रधानमन्त्री पुष्पकमल दाहाल प्रचण्डले पार्टी सभापति शेरबहादुर देउवासँगको सहकार्यमा मन्त्री विस्तार गर्दा समूहबाट उनै गुरुङ र लिम्बुमात्रै मन्त्री बनेका छन् । थप एक जना मन्त्री र राज्यमन्त्री भने समूहले पाएन । आखिर यत्रो समय सरकारलाई पूर्णता दिन बाधक बनेर समूहले किन पुरानै भागवण्डामा चित्त बुझायो त ? यसको जवाफ आफूहरूसँग नभएको समूहका नेताहरू बताउँछन् । 

यो विषयले समूहले मन्त्री पठाएसँगै समूहमा भने असन्तुष्टि छाएको छ । बाह्रखरीसँग कुराकानी गर्दै समूहका एक नेताले समूहका नेता शेखर कोइराला र महामन्त्री गगन थापाबाट समूहलाई दिइएको बचन पूरा नगरेको बताए । आफूहरूलाई तीन मन्त्री र एक राज्यमन्त्री आश्वासन देखाएर किन दुई मन्त्रालय मात्र लिएको भन्ने आफूहरू जानकार नभएको उनले बताए । आफूहरूसँग सल्लाह नभभएको भन्दै उनले कारण र जवाफ नेताहरू थापा र कोइरालासँग सोध्न अनुरोध गरे ।

“हामीलाई तीन मन्त्री र एक राज्यमन्त्री दिने भनेर नेता शेखर कोइराला र महामन्त्री गगन थापाले पटक–पटक ब्रिफिङ गरेका हुन्,” ती नेताले बाह्रखरीसँग भने,“तर,संख्या काटियो किन थाहा भएन । यसको जवाफ उहाँहरुले नै दिनुहोला ।”

समूहबाट धनराज गुरुङले कानुन मन्त्रालयको जिम्मेवारी प्राप्त गर्दा शेखरका विश्वासपात्र डिगबहादुर लिम्वुले युवा तथा खेलकुद मन्त्रालय पाएका छन् । स्वास्थ्य मन्त्रालयको जिम्मेवारी पाएका मोहनबहादुर बस्नेत भने शेखर समूहका होइनन् । उनी संस्थापन पक्षको कोटाबाट मन्त्री बनेका हुन् । समूहबाट थप एक मन्त्रीमा जीवन परियार वा बद्री पाण्डेमध्ये एक र सुरेन्द्रराज आचार्यको समेत चर्चा थियो । 

आचार्यका अनुसार मंगलबारमात्र नेता कोइरालाले समूहबाट आफूसहित सबैको नाम सभापति देउवालाई दिएका थिए । तर, त्यसपश्चात् किन २ जनाको नाम आएन आफू जानकार नभएको उनको प्रतिकृया छ । 

“हिजोमात्र शेखर दाइले हामी चारजनाको नाम दिनुभएको जानकारी मलाई आएको थियो । अहिले २ जनाको मात्र नाम आयो,'' उनले बाह्रखरीसँग भने, “यतिमात्र पाउने भए हामी पहिले जादा भइहाल्थ्यो नि । किन यतिसमय रोकिनुपर्थ्यो र।”

कांग्रेस प्रमुख सचेतक रमेश लेखका अनुसार कांग्रेसले मन्त्रीमा पाएको कोटा पूरा भएको छ । गठबन्धन बैठकपश्चात् सञ्चारकर्मीहरूसँग कुराकानी गर्दै उनले अन्य दलले मन्त्रीको नाम पठाएपछि सरकारले पूर्णता पाउनेछ । 
“कांग्रेसले पठाइसक्यो । बाँकी रहेका मन्त्रालय चाँडै पूर्णता दिने कुरा भएको छ,” उनले भने ।