बुटवल । बुटवल उपमहानगरपालिकाको बुद्धनगरदेखि नहरपुर जोड्ने सडक निर्माणको काम सुरु भएको छ । बुटवल ११ बुद्धनगर तिनाउ पुलदेखि नहरपुर झोलुंगे पुलसम्मको सडक बिस्तार तथा कालोपत्रे गर्ने कामको सोमबार शिलान्यास भएको हो ।
बुद्धनगरमा एक कार्यक्रमका बीच नगरप्रमुख खेलराज पाण्डेयले सडकको शिलान्यास गरेका हुन् । सडकको शिलान्यास गर्दै प्रमुख पाण्डेयले बुद्धनगरदेखि नहरपुरसम्मको सडक बिस्तारका क्रममा स्थानीयलाई साथमा लिएर काम अघि बढाउने बताए ।
उनले स्थानीयलाई लाभ हुने र पूर्वपश्चिम राजमार्गको तिनाउ पुल निर्माणको काम सुरु भएपछि वैकल्पिक सडकका रुपमा प्रयोग हुने गरी सडक बिस्तार गर्न लागिएको बताए । उनले स्थानीयको आवश्यकता र मागअनुसार सडक बिस्तारको काम अघि बढाउने बताउँदै निर्माण व्यवसायीलाई साथ दिन आग्रह गरे ।
प्रमुख प्रशासकीय अधिकृत टेकराज पन्थीले बुटवल उपमहानगरपालिकाका भित्री सडकहरुको स्तरोन्नति र निर्माणको काम सुरु भएको र यसले निरन्तरता पाउने बताए । दुई करोड ६० लाख ६५ हजार लागतमा ठेक्का सम्झौता भएको सडक आगामी जेठ १५ भित्र सम्पन्न गर्ने गरी थापा दास जेभी बुटवलले ठेक्का पाएको छ ।
