न्युयोर्क । विश्व चर्चित व्यापारिक कम्पनी अमेजनका प्रमुख जेफ बेजोसकी प्रेमिका लरेन सान्चेजलाई कुनै समय उनको धेरै शारीरिक वजनका कारण साउथवेस्ट एयरलायन्सले फ्लाइट एटेन्डेन्टको जागिर दिन अस्वीकार गरेको बुझिएको छ ।
पत्रकार तथा हेलिकोप्टर पाइलटसमेत रहेकी ५३ वर्षीया सान्चेजले डब्ल्यूएसजे म्यागजिनलाई अन्तर्वार्ता दिने क्रममा सन् १९८९ मा साउथवेस्टको वजन सीमाका लागि लायक बन्न आफूले वजन भने नघटाएको बताएकी छन् । उनी १८ वर्षको उमेरमा फ्लाइट एटेन्डेन्ट बन्ने आशामा घर छाडेर लस एन्जेल्स पुगेकी थिइन् ।
सान्चेजले त्यतिबेला जागिरका लागि वजन ११५ पाउन्ड हुनुपर्नेमा आफ्नो वजन भने १२१ पाउन्ड रहेको स्मरण गरेकी छन् ।
सन् १९८९ यता साउथवेस्टका नियमहरूमा परिर्वतन आइसकेका छन् । अहिले यस जागिरका लागि एयरलाइनले राखेका योग्यतामा उम्मेदवारको न्यूनतम उमेर २२ वर्ष र शारीरिक स्वरूप आकर्षित हुनुपर्ने तथा पचास पाउन्ड वजनको समानसमेत जुरुक्क उचालेर यताउता राख्न सक्ने हुनुपर्ने जस्ता कुरा उल्लेखित छन् । अमेरिकामा महिलाहरूलाई हलिउडमा काम पाउन पनि शरीरको वजनले ठूलो भूमिका खेलेको हुन्छ ।
सान्चेजले भनेकी छन्, “यदि अहिले मलाई कुनै एयरलाइनले शरीरको वजनकै कारण जागिर अस्वीकार गरेमा मैले भन्ने थिएँ– म स्टेवार्डेस होइन, पाइलट बन्न चाहन्छु ।"
याहु लाइफबाट ।
