काठमाडौं । साविक विजेता लुम्बिनी प्रदेश काठमाडौंमा जारी यू–१९ राष्ट्रिय पुरुष क्रिकेट प्रतियोगिताको फाइनलमा प्रवेश गरेको छ । शनिबार कीर्तिपुरस्थित त्रिवि क्रिकेट मैदानमा भएको खेलमा मधेस प्रदेशलाई ५८ रनले पराजित गर्दै लुम्बिनी फाइनल पुगेको हो ।
लुम्बिनीले दिएको २२३ रनको लक्ष्य पछ्याएको मधेस ४५.४ ओभरमा १६४ रनमा अलआउट भयो । मधेसका लागि मयन यादवले ४५ बलमा सर्वाधिक ३८ रन बनाए । सरफराज मन्सुरले ३१ रनको योगदान गरे । अलि अन्सारीले २२ तथा डब्लु मल्लिकले १८ रन जोडे ।
लुम्बिनीका लागि अभिषेक गौतम र विशाल विक्रम केसीले समान तीन/तीन विकेट लिए । तुलबहादुर थापा, दुर्गेश गुप्ता र निर्मल गुरुङले समान एक/एक विकेट लिए ।
त्यसअघि, पहिले ब्याटिङ गरेको लुम्बिनीले ५० ओभरमा नौ विकेटको क्षतिमा २२२ रन बनाएको थियो ।
जितसँगै लुम्बिनी लगातार दोस्रोपटक फाइनलमा पुगेको छ । अब सोमबार हुने फाइनलमा लुम्बिनीले सुदूरपश्चिम प्रदेशको सामना गर्नेछ ।
सातै प्रदेश टोलीको सहभागिता रहेको प्रतियोगिताको विजेताले दुई लाख र उपविजेताले एक लाख रुपैयाँ नगद पुरस्कार पाउनेछन् ।
