काठमाडौं । फिफा विश्वकपमा बुधबार भएको समूह ‘एफ’को खेलमा बेल्जियमले क्यानडामाथि कठिन जित निकालेको छ । कतारको अहमेद बिन अलि रंगशालामा भएको खेलमा बेल्जियमले क्यानडालाई १–० ले हरायो ।
बेल्जियमको जितमा मिची बट्सुएयीले निर्णायक गोल गरे । बट्सुएसीले ४४औँ मिनेट गरेको गोलसँगै बेल्जियमले महत्त्वपूर्ण तीन अंक सुरक्षित गर्यो ।
त्यसअघि, खेलको ११औँ मिनेटमा क्यानडाले पेनाल्टीको अवसर पाए पनि सदुपयोग गर्न सकेन । अल्फान्सो डेभिसले गरेको प्रहारले जाली चुम्न नसक्दा क्यानडाले अग्रताको सुनौलो अवसर गुमाएको थियो ।
बेल्जियमका स्ट्राइकर रोमेलु लुकाकु घाइते भएका कारण टोलीमा थिएनन् ।
जितसँगै तीन अंक जोडेको बेल्जियम समूहको शीर्ष स्थानमा उक्लिएको छ । पराजित क्यानडा पुछारमा पुगेको छ । समूहमा समान एक अंक जोडेका क्रोएसिया र मोरोक्को क्रमशः दोस्रो र तेस्रो स्थानमा छन् ।