पोखरा । ०७४ को प्रतिनिधिसभा तथा प्रदेशसभा निर्वाचनमा मुस्ताङमा एमालेले सबै क्षेत्रमा जीत हासिल गरेको थियो । कांग्रेस मुस्ताङका नेता रोमी गौचन थकालीसहित कांग्रेसका सबै उमेदवार पराजित भए । हिमालपारिको जिल्ला मुस्ताङलाई अहिले पनि एमालेले आफूले जित्ने सूचीमा राखेकोे थियो । उमेदवार पनि पुरानै थिए । मुस्ताङ (क) मा इन्द्रधारा ढाडु विष्ट दोहोरिएका थिए भने (ख) मा अघिल्लोपटक समानुपातिक सांसद बनेका चन्द्रमोहन गौचन मैदानमा थिए । प्रतिनिधिसभामा चाहीँ प्रेमप्रसाद तुलाचन नै दोहोरिएका थिए ।

०७४ मा नै प्रतिनिधिसभामा प्रेमप्रसाद तुलाचनसँग हार व्योहोरेपछि यसपटक रोमी गौचनले चासो राखेनन् । उनले छोरालाई अगाडि सारे । २९ वर्षका योगेश गौचन थकालीसहित (क) मा कांग्रेसले नाम्डु गुरुङ र (ख)मा विकल शेरचनलाई अगाडि सार्यो । 

एमालेका दोहोरिएका अनुहार र कांग्रेसका नयाँ युवा अनुहारबीचको प्रतिस्पर्धा भयो । तर, मतदाताले मन फेरे । एमालेले पकड क्षेत्र भनेको मुस्ताङमा कांग्रेसले सबै क्षेत्र जितेर एमालेलाई शून्य बनाइदियो ।

बाम गठबन्धनको वर्चस्वबीच प्रतिनिधिसभाका २ र प्रदेशसभाका चारवटै क्षेत्र गुमाएको कांग्रेसले बागलुङमा यसपटक जसरी पनि साख फर्काउन चाहन्थ्यो । त्यसका लागि कांग्रेसले प्रतिनिधिसभाका २ वटै क्षेत्र छाडेर प्रदेशका ४ सिट लियो ।

बुधबार अन्तिम मतपरिणाम आउँदा बागलुङबाट पनि एमाले निल हुन पुग्यो । गठबन्धनका सबै उमेदवारले जिते ।
म्याग्दीलाई आफ्नो गढ मान्ने एमालेले यसपटक त्यहाँ पनि पकड गुमाउन पुग्यो । गठबन्धनको सिट बाँडफाँटको क्रममा सुरुमा एउटा प्रतिनिधिसभा क्षेत्र रहेको म्याग्दी माओवादी केन्द्रको भागमा परेको थियो । तर, म्याग्दी कांग्रेस सभापति खम्बिर गर्बुजाले अन्तिम समयमा प्रतिनिधिसभाको टिकट आफूले ल्याए । प्रदेश माओवादीको भागमा पर्यो । खम्बिर गर्बुजा तेस्रोपटकको प्रयासमा संसद् छिर्दै गर्दा म्याग्दीका प्रदेशसभाका दुवै क्षेत्रमा माओवादीका उमेदवार विजयी बने ।

फराकिलो मतान्तरले गोरखा २ मा माओवादी केन्द्रका अध्यक्ष पुष्पकमल दाहाल ‘प्रचण्ड’ र क्षेत्र नं. १ मा कांग्रेसका राजेन्द्र बजगाईं जीतनजिक पुग्दा चारवटै प्रदेशसभाका क्षेत्रमा गठबन्धनका उमेदवार विजयी बनेका छन् । यहाँ माओवादीले प्रदेशसभाको एक क्षेत्र, बाबुराम भट्टराई नेतृत्वको नेपाल समाजवादी पार्टीले एक र बाँकी दुई कांग्रेसले लिएको थियो । प्रदेशसभाका सबै क्षेत्रमा गठबन्धनका उमेदवार जित्दा गोरखामा पनि एमाले शून्य बन्न पुगेको हो ।