पोखरा । २०५४ सालमा बागलुङ जिल्लाकै सबैभन्दा ठूलो पार्टी रहेको राष्ट्रिय जनमोर्चा अहिले आफूले एक्लै जित्न त सक्दैन, तर हराउने ल्याकत राख्छ । स्थानीय तहको वडागत परिणाम हेर्ने हो भने सबैभन्दा ठूलो शक्ति कांग्रेस, दोस्रोमा माओवादी, तेस्रोमा एमाले र चौथोमा राष्ट्रिय जनमोर्चा छ ।

स्थानीय तहमा पनि गठबन्धन गरेर राम्रो नतिजा निकालेको बागलुङले प्रदेश तथा प्रतिनिधीसभा निर्वाचनमा पनि त्यसलाई कायम राख्दा एमाले सबै क्षेत्रमा पराजय व्योहोर्न बाध्य भएको छ ।

०७४ को प्रदेशसभा तथा प्रतिनिधीसभामा बागलुङमा बाम एकताका कारण कांग्रेसको अवस्था अहिलेको एमालेको जस्तै भएको थियो ।

सत्ता गठबन्धनका हेभिवेट उमेदवार राष्ट्रिय जनमोर्चाका अध्यक्ष चित्रबहादुर केसी, माओवादी केन्द्रका सचिव देवेन्द्र पौडेललगायत नेता यही जिल्लाबाट आकांक्षी हुँदा गठबन्धनको भागबण्डामा असन्तुष्टि हुने र त्यसको फाइदा एमालेलाई हुने विश्लेषण बागलुङमा चल्यो । तर, प्रदेशसभाका चारवटै क्षेत्र कांग्रेसलाई दिने प्रतिनिधिसभाको १ नं. क्षेत्र जनमोर्चा र २ नं क्षेत्र माओवादीलाई दिने सहमति बन्यो ।

कांग्रेससँगको पहिलो गठबन्धनबाट चित्रबहादुर केसीले चुनाव लड्ने भए । अर्को क्षेत्रमा देवेन्द्र पौडेल उमेदवार बने ।

स्थानीय तहको गणित हेर्दा गठबन्धन सबै क्षेत्रमा बलियो नै थियो । अर्कातर्फ, पहिलो, दोस्रो र चौथो शक्ति मिल्दा गठबन्धनका उमेदवारहरु जितोन्मुख नै देखिन्थे ।

तर, पर्वत, नवलपुर, कास्कीलगायत जिल्लामा गठबन्धन लथालिंग हुँदा बागलुङ भने एकढिक्का हुन पुग्यो । प्रतिनिधिसभामा चित्रबहादुर केसी र देवेन्द्र पौडेलले जिते । प्रदेशसभामा कांग्रेसका चारै उमेदवार पनि विजयी बने ।

बुधबार अपराह्न सार्वजनिक मतपरिणाम अनुसार देवेन्द्र पौडेलले एमाले उमेदवार मञ्जु शर्मालाई पराजित गर्दै बागलुङलाई गठबन्धनको अन्तिम जित दिलाए ।

पौडेलले २४ हजार ७७९ मत ल्याउँदा एमाले उमेदवार शर्माले २० हजार १८० मत ल्याइन् । शिक्षामन्त्री समेत रहेका पौडेल चार हजार ५९९ मतान्तरले विजयी बने ।

पौडेल अघि जनमोर्चाका अध्यक्ष चित्रबहादुर केसीले एमालेकै सूर्य पाठकलाई पराजित गरे । उनले २१ हजार मत ल्याउँदा एमालेका पाठकले १८ हजार ८२५ मत ल्याए ।

पाठक अघिल्लोपटक पनि सोही क्षेत्रबाट उमेदवार बनेर विजयी भएका थिए । शर्मा भने गत वैशाखमा सम्पन्न स्थानीय तह निर्वाचनमा नेपाली कांग्रेसले उमेदवार नबनाएपछि स्वतन्त्ररूपमा गलकोट नगरपालिकाको प्रमुखमा चुनाव लडेकी थिइन् । कांग्रेसको बागी बनेकी उनी पछि एमाले प्रवेश गरेकी थिइन् । स्थानीय तह चुनावमा उनले तीन हजार २६३ मत ल्याएकी थिइन् । कांग्रेस त्यागेर आउनासाथ एमालेबाट उमेदवार बनेकी उनी अन्य दलभित्रका असन्तुष्ट मत बटुलेर जित्ने आशमा छिन् ।

यो सँगै बागलुङमा कांग्रेसबाट बागी बनेर एमाले प्रवेश गरेर उमेदवार बनेका सबै पराजित भएका छन् । बागलुङ २ (ख) मा पनि एमालेले माओवादीका बागीलाई समर्थन गरेको थियो ।

यो क्षेत्रमा कांग्रेसका जितबहादुर शेरचन र प्रकाश घर्तीमगर प्रतिस्पर्धामा थिए । सूर्य चुनाव चिह्नबाट नलडे पनि घर्तीलाई एमालेको समर्थन थियो । तर, उनी तीन हजार १०० मतले पराजित भए ।

शेरचनले १५ हजार १०८ मत ल्याउँदा घर्तीले १२ हजार ८ मत पाएका थिए । स्थानीय तह निर्वाचनमा घर्ती ताराखोला गाउँपालिकामा माओवादीबाट बागी उमेदवार बनेका थिए ।