पोखरा । मुख्यमन्त्री कृष्णचन्द्र नेपाली पोखरेलले गण्डकीका अर्का मन्त्रीपनि बर्खास्त गरेका छन् । गत हप्ता मात्रै उनले ऊर्जा, जलश्रोत तथा सिँचाइमन्त्री हरिशरण आचार्यलाई हटाएका थिए । उनले मंगलबार भौतिक पूर्वाधार, सहरी विकास तथा यातायातमन्त्री कुमार खड्कालाई हटाएका हुन् ।

कांग्रेसबाट समानुपातिक सांसद बनेर मन्त्री बनेका खड्कालाई प्रधानमन्त्री तथा कांग्रेस सभापति शेरबहादुर देउवाको 'ग्रिन सिग्नल' मिलेपछि मुख्यमन्त्रीले हटाएका हुन् ।

स्रोतका अनुसार मुख्यमन्त्री र कांग्रेस पार्टी तथा उमेदवारलाई 'असहयोग गरेपछि' उनलाई हटाइएको हो ।

यसअगाडि बर्खास्तीमा परेका हरिशरण आचार्यलाई चाहिँ प्रचण्डलाई असहयोग गरेको भन्दै हटाइएको थियो ।

कुमार खड्का कास्की २(ख) बाट टिकटका आकांक्षी थिए । तर, उनको सट्टामा कानुनमन्त्री विन्दुकुमार थापाले टिकट पाए । 

त्यसयता चुनावी अभियानमा असहयोग गरेको भन्दै प्रधानमन्त्री देउवाकहाँ कुरा पुगेको थियो । मुख्यमन्त्रीले हरिशरण आचार्यलाई हटाउने बेलामा नै मन्त्री खड्कालाई पनि हटाउने तयारी गरेका थिए । तर, त्यतिबेला देउवाले निर्णय लिइनसकेको कारण उनको मन्त्री पद जोगिएको थियो ।

प्रदेशमा कांग्रेस नेतृत्वको सरकार बनाउन खड्काको भूमिका थियो । तर, अहिले चुनावको टिकट नपाएपछि उनी असन्तुष्ट थिए ।