काठमाडौं । अस्ट्रेलियामा बलात्कार आरोपमा पक्राउ परेपछि श्रीलंका क्रिकेट संघ (एसएलसी)ले दनुस्का गुणाथिलकालाई क्रिकेटका तीनवटै संरचनाबाट तत्काल लागु हुने गरी निलम्बन गरेको छ । 

बलात्कारको आरोपमा आइतबार सिड्नीबाट पक्राउ परेपछि ट्वान्टी–२० विश्वकपका लागि अस्ट्रेलिया पुगेको श्रीलंकन टिम गुणाथिलकाबीनै स्वदेश फर्किएको थियो । गुणाथिलकामाथि एक महिलाले नोभेम्बर २ मा आफूमाथि बलात्कार गरेको आरोप लगाएकी छन् ।

यसैकारण सिड्नी प्रहरीको अनुसन्धानमा रहेका गुणाथिलकालाई एसएलसीले सोमबार क्रिकेटका तीनवटै संरचनाबाट निलम्बन गर्ने निर्णय गरेको हो ।

“अस्ट्रेलियामा एक महिनामाथि यौन हिंसा गरेको आरोप लागेका दनुस्का गुणाथिलकालाई तत्काल लागु हुने गरी क्रिकेटको तीनवटै संरचनाबाट निलम्बन गर्ने निर्णय गरिएको छ, सोमबार श्रीलंका क्रिकेट बोर्डले जारी गरेको विज्ञप्तिमा उल्लेख छ । 

विश्वकपमा सुपर–१२ बाट बाहिरिएको श्रीलंकाबाट गुणाथिलकाले एक खेल खेलेका थिए । बायाँ हाते ब्याटर दनुस्काले विश्वकपअन्तर्गत पहिलो चरणमा नामिबियासँगको खेल खेलेका थिए । यो खेलमा डक आउट भएका उनी त्यसपछि भने चोटका कारण प्रतियोगिताबाट बाहिरिएका थिए ।

विश्वकपमा सुपर–१२ को समूह–१ मा श्रीलंका चौथो स्थानमा सीमित बनेको थियो ।