पोखरा । चुनावको मुखैमा एमाले प्रवेश गरेका अब्दुस मियाँको डेब्यू चुनाव नै 'हेबिवेट' नेतासँग हुँदै छ । उनी माओवादीका लागि 'सुरक्षित' मानिएको क्षेत्र गोरखा–२ बाट पुष्पकमल दाहाल 'प्रचण्ड'सँग भिड्दै छन् । स्थानीय तहको चुनावको नतिजा हेर्दा प्रचण्ड सबैभन्दा सुरक्षित उमेदवारमध्येका एक हुन् । 

माओवादी जनयुद्धको आधार, क्रान्तिको  रूपरेखा, अध्यापन गरेको भनेर प्रचण्डले गोरखाली मतदाता रिझाउने प्रयास गरिरहेका छन् ।

युवा उमेदवार अब्दुस चाहिँ आफूलाई युवा र संसद्मा नयाँ विषय उठाउने भन्ने एजेन्डाका साथ चुनावमा उत्रिएका छन् । अब्दुस अहिले एमालेले प्रतिनिधिसभामा उठाएका सबैभन्दा कान्छा उमेदवार हुन् ।

माओवादीले जनयुद्धको रणनीति बनाएको भनेर प्रचण्डले त्यहाँका मतदातासँग सहानुभूति मागिरहँदा अब्दुसले भने आफूहरू पृथ्वीनारायण शाहका सहयोगी वंशको प्रतिनिधि भएको बताइरहेका छन् ।

लिगलिगकोटको दौड जितेर तत्कालीन गोरखाका राजा बनेका द्रव्य शाहको घरमुनि आफ्नो घर रहेको उनको दाबी छ । द्रव्य शाहपछिका १० औँ राजा पृथ्वीनारायण शाहलाई आफ्नो पुस्ताले सहयोग गरेको अब्दुस बताउँछन् । 

पूर्व प्रधानमन्त्री बाबुरा भट्टराईले 'सुरक्षित' मानिएको क्षेत्र छाडिदिएपछि प्रचण्डले 'रिल्याक्स' महसुस गरेका छन् । साथै उनी भावुक पनि बनिरहेका छन् । यतिसम्मकि गोरखालाई उनले 'चिनकाङसाङ' भनेका छन् । 

उनले आफू गोरखामा अन्तिम 'युद्ध' लड्न आएको पनि बताएका छन् । आफ्नो युवाकाल बितेको, जनयुद्धको थालनी भएको, युद्धको सैनिक तालिम लिएको, पार्टीको पहिलो हेडक्वाटर भएको जिल्ला गोरखालाई चिनकाङसाङ भएको भन्दै उनी मतदाता फकाउनमा व्यस्त छन् ।

अब्दुस भने गोरखामा बाबुरामलाई जति माया प्रचण्डलाई नगर्ने र आफू युवापुस्ताको, भविष्य बोकेको युवा उमेदवार भएको हुँदा गोरखालीको प्रेमले चुनाव जित्ने दाबी गर्छन् ।

“प्रचण्डलाई मन नपराउने मतदाताले मत मलाई दिन्छन् भन्ने आश छ,” कुराकानीमा उनले भने, “प्रचण्डले गोरखाबाट चुनाव जितेर प्रधानमन्त्री भएर के हुन्छ ? बाबुराम भट्टराई पनि गोरखाबाटै जितेर प्रधानमन्त्री बन्नुभएको हो । प्रचण्डले सिरहाबाट पनि जित्नुभएको हो । ती ठाउँ के भए त ? त्यसकारण गोरखाबाट जितेर के हुन्छ ?”

उनी प्रचण्डलाई जिताउनुपर्ने कुनै कारण नभएको बताउँछन् । बरु आफूलाई जिताउनपर्ने हजार कारण रहेको उनको जिकिर छ । 

उमेदवारी दिएपछि प्रचण्डले जनक्रान्तिको सुरुवात गोरखाबाटै भएको भन्दै गोरखासँगको आफ्नो साइनो मतदातालाई सुनाए । गोरखाबाट चुनाव लड्दैगर्दा त्यहीँको कुनै विद्यालयमा अध्यापन गरेको प्रसंग ल्याएर आफू गोरखाका लागि नयाँ व्यक्ति नभएको उनको भनाइ थियो । 

तर, प्रचण्डको अभिव्यक्तिलाई अब्दुस प्रतिवाद गर्छन् ।

उनले भने, “प्रचण्डले मैले क्रान्तिको रूपरेखा गोरखामा बसेर कोरेको हो भन्नुभएको छ । के विश्वविद्यालयको नक्सा डिजाइन गरेको हो र यहाँ बसेर ? प्रचण्डले गर्दा कत्रो विश्वविद्यालय बन्यो होइन ? जिताउनुपर्छ,” उनले भने, “हतियारको भण्डार बन्यो र हतियार प्रयोग भएर गोरखाली नै मरे । देशमा मान्छे मरे । त्यसैले, गोरखाले प्रचण्डलाई जिताउनुपर्ने कारण नै छैन । अब्दुसलाई जिताउने हजार कारणहरू छन् । यो कुरा मैले एकदम बलियोका साथ भन्ने गरेको छु ।”

स्थानीय तहको नतिजा हेर्ने हो भने एमाले भन्दा सत्ता गठबन्धन झन्डै आठ गुणा बढी मतान्तरले अगाडि छ । स्थानीय तह चुनावको मत देखेर प्रचण्ड 'रिल्याक्स' महसुस गर्दैछन् ।

अब्दुस भने आफू युवा र स्पष्ट एजेन्डासहित आएकाले जनताले साथ दिने बताउँछन् । कम उमेरमा चुनाव लडिरहेको युवा र वर्षौंदेखि चुनाव लडिरहेका प्रचण्डको तुलना मतदाताले नै गर्ने उनको भनाइ छ । आफूले स्थानीयबाट सकारात्मक प्रतिक्रिया पाएको पनि उनले सुनाए ।