काठमाडौं । मोहम्मद सालाहले च्याम्पियन्स लिगमा गोल गर्नेक्रमलाई जारी राखेको खेलमा लिभरपुलले बुधबार राति आयाक्सलाई ३–० ले हराउँदै प्रतियोगिताको नकआउट चरणमा स्थान पक्का गरेको छ । 

अघिल्लो साता सबैभन्दा कम अन्तरालमा ह्याट्रिक गर्ने कीर्तिमान बनाएका सालाहले पछिल्लो चार च्याम्पियन्स लिगमा ६ गोल गरिसकेका छन् ।

गएराति सालाहले ४२औँ मिनेटमा गरेको गोलबाट लिभरपुलले अग्रता लिएको थियो । ४९औँ मिनेटमा डार्विन नुनेजले अग्रता दोब्बर बनाए । ५२औँ मिनेटमा हार्भे इलियोटले अर्को गोल थपेपछि लिभरपुलले जित पक्का गरेको हो । 

जितसँगै लिभरपुलले नकआउट चरणमा स्थान पक्का गरेको हो । समूह चरणमा एक खेल बाँकी हुँदा १२ अंक जोडेको लिभरपुल समूह ‘ए’को दोस्रो स्थानमा छ ।

यस समूहबाट यसअघि नकआउट चरणमा स्थान पक्का गरिसकेको नेपोली १५ अंकका साथ शीर्ष स्थानमा छ । हारसँगै नेदरल्यान्ड्सको क्लब आयाक्स प्रतियोगिताबाट बाहिरिएको छ । आयाक्सको तीन अंकमात्र छ । पुछारको रहेको रेन्जर्स अंकविहीन छ । 

गएराति नै इटालियन क्लब नेपोलीले रेन्जर्सलाई ३–० ले हराएको थियो । इटालियन सिरी ‘ए’को शीर्ष स्थानमा रहेको नेपोली जारी सिजन अपराजित छ । नेपोलीको जितमा जियोभानी सिमोनीले दुई गोल गरे भने लियो ओष्टिगार्डले एक गोल गरे ।