काठमाडौं । युरो–२०२४ को ‘ग्रुप अफ डेथ’ का रूपमा परिचिति समूह ‘बी’ मा स्पेन र साविक विजेता इटालीले विजयी सुरुआत गरेका छन् । 

शनिबार राति भएको समूहको पहिलो खेलमा स्पेनले क्रोएसियाविरुद्ध ३–० को सहज जित निकालेको हो । बर्लिनमा भएको खेलमा स्पेनलाई जित दिलाउन कप्तान अल्भारो मोराटा, फाबियन रुइज र ड्यानी कार्भाहालले गोल गरे ।

स्पेनले तीन गोल नै पहिलो हाफमा गरेको थियो । खेलको २९औँ मिनेटमा मोराटाले गोल गर्दै स्पेनलाई अग्रतामा राखेका थिए । ३२औँ मिनेटमा रुइजले स्पेनको अग्रता दोब्बर पारे । यस्तै, पहिलो हाफको इन्जुरी समयमा कार्भाहालले गोल गर्दै स्पेनलाई ३–० को अग्रतामा राखेका थिए । 

यसपछि दोस्रो हाफमा गोल हुन नसक्दा स्पेनले सहज जितबाट प्रतियोगिताको सुरुआत गरेको हो । 

आइतबार बिहान भएको समूहको दोस्रो खेलमा साविक विजेतासमेत रहेको इटालीले अल्बानियाविरुद्ध २–१ को जित निकालेको हो ।

सिंगल इदुना पार्कमा भएको खेलमा इटालीलाई जित दिलाउन एलेसान्ड्रो बास्टोनी र निकोलो बरेल्लाले गोल गरे । अल्बाबियाका नेदिम बजरामीले गोल गरेका थिए ।

खेलको पहिलो मिनेटमै बजरामीको गोलमा अल्बानियाले अग्रता बनाएको थियो । तर, अल्बानियाको यो अग्रता लामो समय टिक्न भने सकेन । ११औँ मिनेटमा बास्टोनीको गोलमा इटाली खेलमा फर्किएको थियो । यस्तै, १६औँ मिनेटमा बरेल्लाले गोल गरेपछि इटालीले २–१ को अग्रता बनाएको थियो । यसपछि थप गोल नहुँदा साविक विजेताले विजयी सुरुआत गरेको हो ।

जितसँगै समूहमा तीन अंक जोडेको इटाली तालिकाको दोस्रो स्थानमा छ । समान तीन अंक नै जोडेको स्पेन गोलआधारमा इटालीभन्दा माथि छ । तालिकाको तेस्रो स्थानमा अल्बानिया र चौथो स्थानमा क्रोएसिया छन् ।