काठमाडौं । आईसीसी ट्वान्टी–२० विश्वकपमा समूह ‘बी’बाट अस्ट्रेलिया शतप्रतिशत नतिजासहित सुपर–८ मा प्रवेश गरेको छ । आइतबार भएको समूह चरणको अन्तिम खेलमा स्कटल्यान्डविरुद्ध पाँच विकेटको जित निकालेपछि अस्ट्रेलिया अपराजित बनेको हो ।

अस्ट्रेलियाको जितले स्कटल्यान्ड समूह चरणबाटै बाहिरिँदा साविक विजेता इंग्ल्यान्ड सुपर–८ मा प्रवेश गरेको छ । इंग्ल्यान्डले स्कटल्यान्डलाई नेट रनरेटमा पछि पारेको हो ।

स्कटल्यान्डले प्रस्तुत गरेको १८१ रनको लक्ष्य अस्ट्रेलियाले दुई बल बाँकी छँदै पाँच विकेट गुमाएर भेट्टायो । 

अस्ट्रेलियाको जितमा ओपनर ट्राभिस हेडले ६८ रन बनाए । हेडले ४९ बलमा पाँच चौका र चार छक्का प्रहार गरे । मार्कुस स्टोइनिसले आक्रामक ब्याटिङ गर्दै २९ बलमा नौ चौका र दुई छक्कासहित ५९ रन बनाए । टिम डेविडले अविजित २४ रन थप्दा ग्लेन म्याक्सवेलले ११ रन जोडे ।

स्कटल्यान्डका मार्क वाट र सफयान सरिफले समान दुई विकेट लिए । ब्राड ह्विलले एक विकेट हात पारे ।

त्यसअघि टस हारेर ब्याटिङमा आएको स्कटल्यान्डले निर्धारित २० ओभरमा पाँच विकेट गुमाएर १५० रनको योगफल खडा गरेको थियो ।

स्कटल्यान्डका ब्रान्डन म्याकमुलमले ६० रन बनाएका थिए । कप्तान रिची बेरिङ्टनले ४२, ओपनर जर्ज मुन्सेले ३५ र म्याथ्यु क्रसले १८ रन थपे ।

अस्ट्रेलियाका ग्लेन म्याक्सवेलले दुई विकेट लिए । एस्टोन अगर, नाथन इल्स र एडम जाम्पाले समान एक विकेट हात पारे ।

जितसँगै चार खेलबाट आठ अंकसहित अस्ट्रेलिया सुपर–८ मा प्रवेश गरेको हो । अस्ट्रेलियाको जितबाट राहत पाएको इंग्ल्यान्डले समान अंक भए पनि रनरेटमा स्कटल्यान्डलाई पछि पार्दै समूहको दोस्रो स्थान हासिल गर्‍याे । इंग्ल्यान्ड र स्कटल्यान्डले समान पाँच अंक जोडे । तालिकाको तेस्रो स्थानमा चित्त बुझाएको स्कटल्यान्ड, चौथो स्थानको नामिबिया र पाँचौ स्थानको ओमान भने प्रतियोगिताको समूह चरणबाटै बाहिरिएका छन् ।