![डर्टमन्ड र बायर्नको सहज जित](https://12khari.top/uploads/posts/FfrZcYuWAAAnM2_1666493741.jpeg)
काठमाडौं । इङ्ल्यान्डका जुडे बेलिङ्घमको दुई गोलप्रेरित बोरुसिया डर्टमन्डले शनिबार राति जर्मन बुन्डेसलिगामा भीएफबी स्टुटगार्टमाथि ५–० को सहज जित दर्ता गरेको छ ।
डर्टमन्डले घरेलु मैदानमा पहिलो हाफमै ३–० को अग्रता लिन सफल भएको थियो । बेलिङ्घमको गोलबाट डर्टमण्डले दोस्रो मिनेटमै अग्रता लिएको थियो । १३ औं मिनेटमा निकलस सुलले अग्रता दोब्बर बनाए ।
४४ औं मिनेटमा जियोभानी रेयनाले तेस्रो गोल थपे । ५३ औं मिनेटमा बेलिङ्घमले व्यक्तिगत दोस्रो थपे । ७२ औं मिनेटमा युसोफा मौकोकोले अर्को गोल थपेपछि डर्टमन्डले सहज जित हासिल गरेको हो ।
जितपछि ११ खेलबाट १९ अंक जोडेको डर्टमन्ड पाँचौँ स्थानमा उक्लिएको छ । पराजित स्टुटगार्ट ८ अंकका साथ रेलिगेसन क्षेत्रमा छ ।
![Global Ime bank](https://baahrakhari.com/uploads/bigyaapan/30885600.gif)
गएराति नै साविक विजेता बायर्न म्युनिखले होफिनहेइमलाई २–० ले हरायो । बायर्नका लागि जमाल मुसिएलाले १८ र इरिक म्याक्सिम चौपो–मोटिङले ३८ औं मिनेटमा गोल गरे । जितसँगै ११ खेलबाट २२ अंक जोडेको बायर्न दोस्रो स्थानमा छ । होफिनहेइम १७ अंकका साथ सातौं स्थानमा छ ।
बुन्डेसलिगामा शनिबार राति नै फ्रेइबर्गले वेर्डर ब्रेमनलाई २–० ले हराउँदै तेस्रो स्थानमा उक्लिएको छ । फ्रेइबर्गले २१ अंक जोडेको छ । जुन दोस्रो स्थानको बायर्नभन्दा एक र शीर्ष स्थानको युनियन बर्लिनभन्दा दुई अंकले पछाडि हो । तर, युनियन बर्लिनले एक खेल कम खेलेको छ ।
इन्ट्राचट फ्रांकफर्टले बोरुसिया मोन्चेनग्लाडबचलाई ३–१ ले हराउँदै चौथो स्थानमा उक्लियो । फ्रांकफर्टले २० अंक जोडेको छ । पराजित मोन्चेनग्लाडबचले १६ अंकका साथ नवौं स्थानमा छ ।
आरबी लाइपजिग र औसबर्गले ३–३ को बराबरी खेले । मेइन्जले कोलिनलाई ५–० ले हरायो । मेइन्ज छैटौं स्थानमा छ भने कोलिन दशौं स्थानमा छ ।