काठमाडौं । गण्डकीका अमृत थापामगरले पोखरामा जारी नवौँ राष्ट्रिय खेलकुद प्रतियोगितामा स्क्वासको पुरुष व्यक्तिगत स्पर्धामा स्वर्ण पदक जितेका छन् ।

सोमबार पोखरा रंगशालास्थित स्क्वास कोर्टमा सम्पन्न फाइनलमा अमृतले वाग्मतीका अह्रान्त सिन्हालाई ३–२ को सेटमा पराजित गर्दै स्वर्ण पदक जितेका हुन् । 

अमृतले स्वासमा लगातार तेस्रोपटक स्वर्ण पदक जितेका हुन् । अमृतले सातौँ र आठौँ राष्ट्रिय खेलकुदमा पनि स्वर्ण पदक जितेका थिए ।

अमृतले पहिलो सेट १२–१० ले जितेका थिए । उनले दोस्रो सेट ८–११ को स्कोरमा गुमाए । तेस्रो सेटमा १२–१० स्कोरमा जितेका अमृत चौथो सेटमा ९–११ ले पराजित भए । निर्णायक सेटमा अमृतले ११–८ ले लिँदै स्वर्ण पदक जितका हुन् ।

यस स्पर्धामा वाग्मतीका अमीर ब्लोन र गण्डकीका दिपक थापाले काश्य पदक जिते ।

पुरुष टिम इभेन्टको खेल सोमबार बेलुकीबाट हुने स्क्वास प्रतियोगिता संयोजक लोकेन्द्रमान सिंह भण्डारीले बताए । 

भण्डारीका अनुसार २ विभागीय टोली र ५ प्रदेशको गरी पुरुषतर्फ कुल २५ जना र महिलातर्फ ७ जनाको सहभागिता रहेको छ ।