पोखरा । आफूबाहेक कांग्रेसको राजनीतिमा अरुलाई निषेध गर्ने रोमी गौचनको राजनीतिका कारण कुनै समय कांग्रेसको उर्वरभूमि रहेको मुस्ताङमा गत निर्वाचनमा कांग्रेसले प्रतिनिधिसभा र प्रदेशसभा निर्वाचनका सबै क्षेत्र गुमाउन पुग्यो । 

कांग्रेस छाडेर एमालेमा प्रवेश गरेका प्रेमप्रसाद तुलाचनले प्रतिनिधिसभाको चुनाव जिते भने प्रदेशमा एमालेकै इन्द्रधारा ढाडु विष्ट र महेन्द्र थकालीले चुनाव जिते । कांग्रेसका सबै उमेदवार पराजित हुन पुगे । 

एमाले प्रवेश गर्नुअघि ती सबैजना कांग्रेसमा नै थिए । तर, जिल्लाको राजनीतिमा उक्लिनै नदिने र निरन्तरको पेलानमा परेपछि आजित भएर उनीहरुले पार्टी फेर्न पुगेका थिए । अहिले पनि मुस्ताङ कांग्रेसमा गौचन नै हाबी छन् ।

हाल मुस्ताङ कांग्रेस सभापति रहेका गौचनको नाम समानुपातिक सूचीमा थियो । ३५ औँ नम्बरमा नाम रहेका उनले पछि फिर्ता लिएका छन् ।

आफूले नाम समानुपातिकबाट फिर्ता लिए पनि प्रतिनिधिसभामा चाहिँ उनले आफ्नै छोरा योगेश गौचन थकालीलाई अगाडि सारेका छन् । २८ वर्षीय थकाली कांग्रेसका तर्फबाट देशभरिकै कान्छो उमेदवार रहेको दाबी गरिएको छ ।

एमालेले चाहिँ प्रतिनिधीसभामा तुलाचनलाई नै दोहोर्‍याएको छ । तुलाचनले नै अघिल्लो चुनावमा गौचनलाई हराएका थिए । यसपटक भने पूर्वमन्त्री गौचनले आफू नउठी आफ्नै छोरालाई संसदीय राजनीतिमा प्रत्यक्षतर्फ डेब्यू गराएका हुन् ।

योगेश पनि बाबुसँगै सक्रिय राजनीतिमा छन् । उनी मुस्ताङबाट कांग्रेस महाधिवेशन प्रतिनिधि बनेका थिए भने कांग्रेस गण्डकी प्रदेशको कार्यसम्पादन समितिका सदस्य पनि हुन् । पुर्ख्यौली होटेल व्यवसाय चलाइरहेका गौचन ट्राभल्स कम्पनीमा पनि आबद्ध छन् ।

दुई प्रदेशसभा रहेको मुस्ताङमा एमालेले ‘क’ मा इन्द्रधारा विष्ट र ‘ख’ मा चन्द्रमोहन गौचनलाई अघि सारेको छ । कांग्रेसले ‘क’ मा नम्बु गुरुङ र ‘ख’ मा विकल शेरचनलाई उमेदवार बनाएको छ ।