विराटनगर । उद्योग संगठन मोरङले आउँदो माघ २६ देखि फागुन ०३ गतेसम्म विराटनगरमा विराट एक्स्पो–२०७९ (कृषि तथा औद्योगिक अन्तर्राष्ट्रिय प्रदर्शनी) आयोजना गर्ने भएको छ । यसको तयारी सुरु गरिएको संगठनले जनाएको छ । 

'आर्थिक विकासको मूल आधार, कृषि, पर्यटन, उद्योग र व्यापार' भन्ने मूल नाराका साथ आयोजना गर्न लागेको विराट एक्स्पोले औद्योगिक उत्पादनको प्रवर्द्धन, कृषि क्षेत्रमा गुणस्तरीय र व्यावसायिक उत्पादन, पर्यटन क्षेत्रको विकास, उत्पादक र उपभोक्ताबीचको सम्बन्ध विस्तार, उत्पादकहरूबी स्वस्थ्य प्रतिष्पर्धा, सम्भावित बजार र प्रविधिको पहिचान, लगानीमैत्री वातावरण निर्माणमा सहयोग पुर्‍याउने संगठनका महानिर्देशक चुडामणि भट्टराईले बताए ।  

बिराट एक्स्पोको सातौँ संस्करणलाई पृथक बनाउन यसपटक क्षेत्रगत सेमिनार, दैनिक पर्यटकिय गन्तव्य प्याकेज, बी२बी बैठक, स्थानीय फुड फेस्टिबल र विभिन्न जातजातिको भेषभुषालाई समावेश गरी सांस्कृतिक कार्यक्रमको आयोजना गर्न लागिएको महानिर्देशक भट्टराईले जानकारी दिए ।

उनले मुलुकभरिको औद्योगिक उत्पादनहरुका साथै सार्क राष्ट्रका प्रदर्शनकर्ताहरूको समेत सहभागिता रहने बिराट एक्स्पोले आर्थिक एवं औद्योगिक प्रवर्द्धनमा सहयोग पुर्‍याउने विश्वास संगठनले लिएको बताए । 

सात दिनसम्म सञ्चालन हुने एक्स्पोमा २० भन्दा बढी क्षेत्रका तीनसय भन्दा बढी स्टल रहनुका साथै झापा, मोरङ, सुनसरीलगायत भारतको सीमावर्ती क्षेत्रका करिब ३ लाख दर्शकले प्रदर्शनीको अवलोकन गर्ने अपेक्षा आयोजक उद्योग संगठन मोरङले लिएको छ ।