काठमाडौं । हुन्डी कारोबारमा संलग्न रहेको आरोपमा प्रहरीले चारजनालाई पक्राउ गरेको छ । २६ लाख ५० हजार रुपैयाँसहित बुधबार (हिजो) दिउँसो काठमाडौंको बत्तीसपुतलीबाट उनीहरूलाई पक्राउ गरिएको प्रहरी प्रधान कार्यालयले जानकारी गराएको छ ।

पक्राउ पर्नेमा श्री बालाजी इम्पोर्ट प्रालिका सञ्चालक गुल्मीको तम्घास नगरपालिका–४ का ५२ वर्षीय भेषराज पाण्डे, भारतको राजस्थानका ५२ वर्षीय बस्नतकुमार राठी, काठमाडौंको कमलपोखरीका ३५ वर्षीय प्रनिश थापा र काठमाडौं महानगरपालिका–१६ का ५२ वर्षीय सुरेश अधिकारी छन् ।

काठमाडौं–९, बत्तीसपुतलीस्थित श्री बालाजी इम्पोर्ट प्रालिमा हुन्डीसम्बन्धी कारोबार भइरहेको भन्ने सूचनाका आधारमा प्रहरी टोली खटिएको थियो । त्यसबारे थप अनुसन्धान गरिरहेको प्रहरीले जनाएको छ ।